Serokkomarê demkî yê Sûriyeyê Ahmed eş Şara mirovên ji derdora xwe ya nêz li wezîfeyên diyarker ên dewletê bi cih dike. Ev tayînkirinên ku dike pirsa ‘Gelo li Sûriyeyê wê careke din xanedaniya malbatî serwer bibe?’ dixe rojevê.
Ahmed eş Şara ku rexne dikir ku malbata Esad salên dûr û dirêj Sûriye veguheran împaratoriya malbatê, îro bi heman rê û rêbazê tevdigere.
Şara birayê xwe Maher eş ŞKara weke Sekreterê Giştî yê Serokkomariyê tayîn kir. Birayekî xwe yê din Hazem eş Şara jî li ser Serokatiya Saziya Pêkanînan bi cih kir ku wê pêkanînên aboriyê yên di dema jinûve avakirinê de birêve bibe.
Her wiha biraziyê xwe Uveys eş ŞKara jî kir Sekreterê Giştî yê Qesra Serokkomariyê. Tê zanîn ku ev pozîsyon bandoreke berfireh a li dora Serokkomariyê diafirîne.
Ya herî balkêş jî ew e ku Şara bûrayê xwe Ahmed ed-Durûbî kir Sekreterê Giştî yê Banka Navendî ya Sûriyeyê ku di diyarkirina polîtîkayên pere yên welêt de xwedî rola diyarker e.
Hem ji ber rabirdûya xwe hem jî ji ber têkiliyên xwe yên malbatî tayînkirin ed-Durûbî kir mijara nîqaşê. Durûbî bûrayê Serokkomar Şara ye, birayê hevjîna wî Latife ed-Durûbî ye.
JI NÛSRAYÊ HETA BI DAÎŞ’Ê RABIRDÛYEKE CÎHADÎST
Rabirdûya Ahmed ed-Durûbî têkiliyên xwe yên bi rêxistinên cîhadîst ên radîkal e. Durûbî wê demê bi Eniya El Nûsra re di nava têkiliyeke nêz de bû ku serkêşê wê Ahmed eş Şara bû ku niha bi navê Ebû Mûhammed el Colanî tê naskirin.
Tê gotin, Colanî ed-Durûbî şandibû Iraqê û hatibû wezîfedarkirin ku li vê derê bi berdêla 120 hezar dolarî fuzeyên bi tîpa ‘Konkurs’ bikire. Tê gotin, ev pere yekser ji aliyê Colanî ve jê re hatibû dayin.
SALA 2015’AN TEVLÎ NAVA DAÎŞ’Ê BÛ
Lê belê ed-Durûbî bi rengekî surprîz di sala 2015’an de ji El Nûsra cuda bû û tevlî nava DAÎŞ’ê bû. Her wiha tê îdîakirin ku fona ji 120 hezar dolarî li gel xwe derbasî nava DAÎŞ’ê kir.
Piştî ku DAÎŞ li Iraqê hate têkbirin ed-Durûbî careke din vegeriya Sûriyeyê, vegeriya Reqayê û piştre jî hewl da derbasî herêmên di bin kontrola El Nûsra (Bi navê xwe yê heyî Heyet Tehrîr eş Şam) yên li Idlibê bibe. Tê gotin, di vê demê de ji Colanî re ragihand ku ew poşman bûye, jê xwestiye ku wî efû bike, lê belê daxwaza wî ya efûkirinê nehatiye qebûlkirin û jê hatiye xwestin, ku pereyê jê re hatiye dayin radest bike.
Li gel vê rabirdûya xwe jî ed-Durûbî piştî hilweşîna rejîma Esad a 8’ê Kanûna 2024’an ji aliyê Serokkomarê demkî Ahmed eş Şakara ve li Sekreteriya Giştî ya Banka Navendî hate bicihkirin.
SÛRIYEYA MALBATA ŞARA
Ev tayînkirin ne tenê ya ed-Durûbî ye. Li gel birayên Serokkomar Maher û Hazem eş Şara, her wiha pismamê wî û zavayê wî Mahîr Mervan jî li wezîfeyeke girîng hate bicihkirin: Walîtiya Şamê.
Pêvajoya ku bi soza ‘Sûriyeya Nû’ destpê kir, vediguhere rewşeke jinûve avakirina serwerî, rê û rêbazên malbatî ku hinceta hilweşîna rejîmê bû.
