Şehîdên Tevgera Azadiya Kurdistanê yên ji Wanê ku ev 3 roj bûn ji bo wan li navçeya Artemêtan ji bo wan şîn hatibû danîn, bi bernameyekê hatin bibîranîn. Bername bi tevlibûna hezaran welatiyan pêk hat û di bernameyê de dirûşmên “Şehîd Namirin”, “Bijî Serok Apo” û “Bê serok jiyan nabe” hatin berzkirin. Aktivîsta TJAyê Ayla Akat Ata û endamê sekreteryaya Îmraliyê Veysî Aktaş jî tev li bernameya bîranînê bûn.
Bi hezaran welatiyan bi hev re ji bo şehîdan deqeyek rêz girtin.
Dû re hevseroka MEBYA-DERê Yusuf Dundar axivî û sersaxî ji malbatên şehîdan re xwest. Yusuf Dundar da zanîn ku xwedîderketina şehîdan xwedîderketina doza wan e û wiha got: “Gelê Serhedê şehîdên xwe hembêz kirin û em minetarê gelê xwe ne. Şehîd pêşeroj û paşeroja me ne û divê em jî wisa nêz bibin. Em hêvî dikin ku êdî gelê me şînan negire û vê êşê nekişîne.”
Piştî axaftina Yusuf Dundar sînevîzyona ku li ser jiyana şehîdên Tevgera Azadiya Kurdistanê hatiye amadekirin, hat nîşandan.
‘YÊN LI BER CELADÊN ME SEKINÎN ŞEHÎD BÛN’
Aktîvîsta TJAyê Ayla Akat Ata di bîranînê de axivî û malbatên şehîdan silav kir. Ayla Akat Ata anî ziman ku gotin têra vê êşê nake û wiha got: “Em îro bi sedhezaran in û bi awayekî azad dibêjin em Kurd in. Niha gavek hatiye avêtin û bila bê zanîn ku ev gav bi çi zor û zehmetiyan hatiye avêtin. Ji bîr nekin ên ku li ber celadên me sekinîn, berxwedan û têkoşîna şehîdan bû. Bi ronahiya Rêber Apo di rêya heqîqetê de pêvajoya Aştî û Civaka Demokratîk hat destpêkirin. Em ê her tim şehîdên xwe bi bîr bînin û xwedî li mîrateya wan derbikevin.”
‘DIVÊ SEKNA ŞEHÎDAN MÎNAK BÊ GIRTIN’
Endamê sekreteryaya Îmraliyê Veysî Aktaş jî di bîranînê de axivî û malbatên şehîdan û gel silav kir. Veysî Aktaş da zanîn ku divê şehîd neyên jibîrkirin û li pey rêya wan bin û ev tişt anî ziman: “Hina têkoşîn di nîviyê de ye, divê heta dawiyê em têkoşîna wan bidomînin. Divê sekna şehîdan mînak bê girtin. Mirin qedera vê erdnîgariyê nîne û Serokatî ev qeder ji holê rakir. Êdî em ketine pêvajoyeke nû û ev yek bi saya van şehîdan pêk hat. Digotin ‘Em dê heta sala 2023yan vî şerî bi dawî bikin’, lewma êrişên xwe zêde kirin, lê hevalan ev armanca wan têk bir. Lewma pêvajo bi saya hevalan hat vê astê. Heke ev pêvajo serbikeve, dê azadî aştî pêk bê. Heta dê azadiya Serokatî jî pêk bê.”
‘EM Ê GELÊ XWE Û SEROKÊ XWE AZAD BIKIN’
Veysî Aktaş diyar kir ku ew şehîdên xwe ji bîr nakin û ev tişt vegot: “Civaka demokratîk armanca me ye, me bedelên pir mezin û pir giran dan. Lê çiqas bedelên giran hatibin dayîn jî wê têkoşîna me bigihêje armanca xwe. Di nava dewletê de hinek kes hene ku naxwazin ev pêvajo bigihêje armaca xwe. Çawa di nava dewletê de kesên wisa hebin, di nava kurdan de jî hene. Me şer dikir digotin ‘aştî’, em aştiyê dikin dibêjin ‘şer’. Ew mirovên dewletê ne û eleqeya wan bi Kurditiyê re nîne. Armanca me azadiya vî gelî ye û divê tu armancên me yên cuda jî nebin. Wê bi têkoşîna me mafên kurdan bikevin di nava qanûna de. Ev civak tevî şer û şehîdan jî aştiyê dixwaze. Em dê ji niha û pê ve têkoşîna siyasî bimeşînin. Azadiya gelê me bi azadiya Serok re girêdayî ye. Em dê siberojê de em gelê xwe hem jî Serok azad bikin.”
Piştî axaftinan bîranîn û şîna şehîdan bi dirûşma “Şehîd Namirin” bi dawî bû.
