Baroya Wanê, Komeleya Hiqûqnasên ji bo Azadiyê (OHD), Komeleya Piştevanî û Alîkariya bi Malbatên Girtî û Hikûmxwaran re (TUHAY-DER), Nûneriya Wanê ya Weqfa Mafên Mirovan a Tirkiye (TÎHV), Sendîkaya Kedkarên Xizmeta Tenduristî û Civakî (SES), Odeya Bijîjkan a Wan-Colemêrg û Parlamentera Wanê Gulderen Varli têkildarî binpêkirinên li Girtîgeha Ewlekariya Bilind a Wanê rapora ku amade kirine, eşkere kirin.
Parêzerê OHD’î Cevat Yilmaz di civîna çapemeniyê de axivî û diyar kir ku girtî li erdê hatine dirêjkirin û hatine derbkirin. Yilmaz got, “Bûyer 9’ê Adarê di saetên nîvro de qewimî. 3 girtî dema ku çûn mafê xwe yê hevdîtina bi telefonê bi kar bînin û piştre vegeriyan, ev bûyer pêk hat. Girtî dema vedigerin dibînin ku li korîdora qawîşên wan gelek gardiyan kom bûne û bi dengê bilind dibêjin ku ew ê li qawîşan lêgerînê bikin. Gardiyan girtî li erdê dirêj dikin û bi lingên xwe pişta wî diperçiqînin. Girtî dibêje nexweşiya wî ya piştê heye, lê tevî vê yekê jî gardiyan tundiyê zêde dikin. Piştre mudaxile li hemû qawîşên siyasî tê kirin.”
Yilmaz anî ziman ku girtiyên li qawîşên din ji bo bûyerê fêm bikin xwestine bi rayedarên girtîgehê re hevdîtinê bikin, lê belê ev yek nehat qebûlkirin û li ser vê yekê girtiyan li deriyên xwe xistine. Yilmaz diyar kir ku li ser vê yekê bi ser qawîşên C9, C13, C16, C21 û C33 de hatiye girtin.
Yilmaz wiha got: “Girtiyan ji me re ragihandin ku gardiyanan li qawîşa C13’ê êşkence li 2 girtiyan kirine. Girtiyek li erdê dirêj kirine û sê karmend pêl pişta wî kirine. Girtiyê din jî dema xwestine ji qawîşê derxin korîdorê, bi zorê hewl hatiye dayîn serê wî bi pêş ve bê tewandin û di vê navberê de tundiya fîzîkî û devkî hatiye pêkanîn. Di encama van herdu mudexeleyan de li ser rû û laşê herdu girtiyan de birîn çêbûne. Tevî daxwaza girtiyan jî piştî 3-4 rojan ku ew şop li ser laşê wan derbasbû, sewqî nexweşxaneyê hatine kirin. Piştî bûyerê der barê girtiyan de lêpirsîna îdarî hat destpêkirin. Girtiyan diyar kirin ku di çarçoveya vê lêpirsînê de di 22’yê Adarê de parastina devkî kirine.
Hin girtiyên ku diyar kirin ku rastî êşkence û muameleya xerab hatine, ji ber bûyerê anîne rojevê û sewqî dadgehê kirin, sirgûnî girtîgehên din kirine. Ew bi fikar in ku ev sirgûnî berdewam bikin. Her wiha girtiyan diyar kirin ku gelek caran li hucreyên girtiyan lêgerîn tê kirin. Di çarçoveya prensîbên hiqûqî yên neteweyî û navneteweyî de, divê sazî li hemberî vê êşkenceyê tavilê bikevin nava tevgerê.”
