Lîstikvan Denîz Turkalî ji ANF’ê re axivî û banga piştgirî dayîna Pêvajoya Aştî û Civaka Demokratîk kir.
Denîz Turkalî, anî ziman ku bi salan e tiştên şaş wekî ku rast bin hatine hînkirin û got ku ji ber vê yekê nêzîkatiyek pêşbiryar pêş ketiye. Denîz Turkalî, diyar kir ku huner dikare ji bo şikandina vê nêzîkatiyê roleke girîng bigire ser milên xwe.
‘HUNER RÊ LI BER HEVRÛBÛNÊ VEDIKE; DIVÊ SIYASETMEDAR SÛDÊ JÊ BIGIRIN’
Denîz Turkalî, destnîşan kir ku sedema hebûna hunerê “hevrûbûnê bi rastiyê re” ye û got: “Beriya her tiştî divê siyasetmedar bizanibin ka wê çawa binêrin. Hûn dikarin ji tiştên ku dibînin, guhdar dikin û dixwînin sûdê bigirin; tenê hewce ye hûn ji cihê rast binêrin û fêm bikin. Hunermend xêz dike, dinivîse, dilîze; lê fêmkirin di çavê kesê ku dinêre de ye, yani bi niyetê ve girêdayî ye.”
Denîz Turkalî, anî ziman ku derbasbûna Tirkiyeyê ya nav pêvajoyeke aştiyê ya mayînde dê bandoreke pir erênî li hunerê jî bike û wiha domand: “Pêvajoyeke aştiyê ya rastîn helbet dê bandorek pir baş li hunerê jî bike. Ez difikirim ku em ê hemû bi hev re ji belaya zext û sansûrê ‘hinekî’ be jî xelas bibin.”
Denîz Turkali, diyar kir ku di meseleya aştiyê de keda jinan pir mezin e û wiha got: “Tevgerên jinan bi berxwedan û nerazîbûnên xwe, tevî ku bi zextên herî giran re rû bi rû man jî, dest ji aştiyê bernedan. Ne tenê li welatê me, li her dera cîhanê ev wiha ye. Ew hîn jî berxwedana xwe berdewam dikin.”
‘BANGA OCALAN PIR GIRÎNG E’
Denîz Turkalî, da xuyakirin ku ew girîngiyê dide banga Abdullah Ocalan û biryara wî ya siyaseta demokratîk û wiha pêde çû: “Banga Abdullah Ocalan bê guman ronahiya hêviyê pêxist. Pir girîng e. Pêvajoya aştiyê ji bo demokrasiyê mijara herî girîng e. Heke ev pêvajo pêk bê, bê guman Kurd, Tirk, Ermenî, Laz kî xwe çawa îfade dike ango bi nav dike bila bibe hemû hunermend dikarin hinekî nefesê bistînin.”
‘PIŞTGIRÎ NEDAYÎNA PÊVAJOYÊ XIRABÎ YE’
Denîz Turkalî, her wiha bang li kesên bifikar kir ku piştgiriyê bidin pêvajoyê û ev tişt gotin: “Zehmet e ku mirov ji fikaran xelas bibe. Her dem dê fikarên me hebin. Lê ji bo ku em piştgiriyê nedin Pêvajoya Aştiyê tu sedemek me nîne; ji vê re ne fikar, xirabî tê gotin. Ji ber ku xwestina aştiyê ne karê wêrekiyê ye. Lê mercên wê aştiyê pir girîng in. Aştiya ku aliyek wê rastî zextan bê û aliyê din hikûm bike, ne aştî ye. Divê em fikarên xwe bidin aliyekî û mercên aştiyê bi rastî binirxînin.”
Dema me ji Denîz Turkalî pirsî ka bangeke wê ji bo siyasetmedaran heye an na, wê ev bersiv da: “Ez bi eşkereyî tercîh dikim ku bi siyasetmedaran re muxeteb nebim. Ez pir siyasetmedaran nas nakim ku gotina min fêm bikin û li ser bifikirin! Ji bo siyasetmedarên ku ne wiha ne jî, karê wan hêsan be; em dest bi dest û mil bi mil bi hev re ne.”
