Şervanê Tûgaya Hesekê Sîpan (Samî Şêxmûs Hiso) 10’ê Îlonê ji aliyê komeke çekdar ve hat revandin û li gundê Edlana yê Serêkaniyê bi awayekî hovane hat qetilkirin. Li hember vê hovîtiyê bi rojan e li bajar û navçeyên Rojavayê Kurdistanê xwepêşandan tên lidarxistin.
Li ser vî esasî îro li Çilaxa, Saziya Malbatên Şehîdan û Gaziyên Bakur û Rojhilatê Sûriyeyê ji bo şermezarkirina qetilkirina şehîd Sîpan daxuyanî dan.
Ji malbatên şehîdan û gaziyan gelek kes di daxuyaniyan de amade bûn.
Daxuyaniya Saziya Malbatên şehîdan ji aliyê Ahîn Şiwêş ve hat xwendin.
Di daxuyaniyê de hat diyarkirin di demeke ku zarokên gelê me ji bo parastina vê axê canê xwe dikin qurban em rastî tawanbariyên nemerd tên. Her wiha hat destnîşankirin ku cihê van kiryarên hovane di ola Îslamê de tineye û wiha hat gotin, “Sûcê li hember şehîd Sîpan ê ji bo parastina civakê dixebitî hat kirin, kiryareke xedar û nemerdane ye.”
Di dawiyê de jî banga hişyarbûnê li gelan hat kirin ku nekevin bin bandora lîstikên qirêj.
Li ser navê Gaziyên Bakur û Rojhilatê Sûriyeyê jî gaziyê bi navê Seîd Mele Yûsif daxuyanî xwend.
Di daxuyaniya gaziyan de jî wiha hat gotin, “Beriya her tiştî em qetilkirina şervanê Tûgaya Hesekê Sîpan (Samî Şêxmûs Hiso) bi tundî şermezar dikin. Tekez divê ji kesên destê wan di vê êrîşa nemerd de heye hesab were xwestin û ew qatil dijwariya edalet û zagonan bibînin. Ev bûyera hov û derveyî mirovahiyê ya ne tenê tawanek e, krîzeke ewlehî û siyasî ye ku aramiya herêmê rasterast dike armanc. Qetilkirina welatiyekî û şervanekî rûımetê ku cihê xwe di nav gelek çalakiyên li dijî çeteyên DAÎŞ’ê girtiye, bi wêrekî û qehremanî şer kiriye, xaka welat û gelên wê parastiye û bi dehan caran, ji mirinê rizgar bûye tê wateya qetilkirina tevahî mirovatiyê ye. Em dibêjin ev hovîtî sînorên tehemula me derbas kiriye. Daxwaza, me mudaxele û bersiveke qanûnî ya pir tund û lezgîn e.
Ev êrîş fitneyeke pir mezin e û armanc jî ew e ku gelan bi hevdu bidin şerkirin. Ev hemû hewldanên şerxwaz û dijminan e. Divê rê li wan were girtin û hesab ji kujeran jî were xwestin.
Em weke gaziyan ji bo pêkvejiyaneke azad û wekhev berdêlên giran dane bang li rayedaran dikin ku divê ev êrîşa hovane û qetilkirina şehîd Sîpan were zelalkirin û edalet cihê xwe bibîne.”
