Serokê Giştî yê MHP’ê Devlet Bahçelî di civîna koma partiya xwe de ya 5’ê Gulanê daxuyaniyeke balkêş da û got, Rêber Apo di pêvajoyê de dikare bi rola ‘Koordînatoriyê’ rabe û statuya wî jî di vê çarçoveyê de bê nirxandin. Piştî vê daxuyaniyê bal çû ser Serokkomarê AKP’yî Erdogan. Erdogan jî roja Înê nirxandin kir û anî ziman ku Tifaqa Cûmhûr ‘biryargeha siyasî’ ya pêvajoyê ye û diyar kir ku vegera ji gavên hatine avêtin wê nebe.
Parlamentera Erzîromê ya DEM Partiyê û endama komîsyonê Meral Daniş Beştaş qonaxa heyî û bendewariyên siyaseta Kurd nirxand.
Meral Daniş Beştaş anî ziman ku pêvajoya heyî bi aliyên xwe yên civakî, siyasî û polîtîkaya derve xwedî rabirdûyeke ji sed salî ye û destnîşan kir ku di rewşa heyî de astengiyeke mezin nîne ku ji holê neyê rakirin, ya pêwîst îrade û wêrekiya siyasî ye.
Beştaş ragihand ku piştî şerê bi dehan salan qonaxeke krîtîk destpê kiriye û got, “Banga 27’ê Sibatê ya Birêz Ocalan deklarasyoneke dîrokî ye. Ev yek di asta jiyanî de girîng e. Di nava salek derbasbûyî de PKK’ê kongreya xwe civand, biryarên xwe eşkere kir ku gelekî girîng bû.”
Parlamentera DEM Partiyê işaret bi zemîna diyalogê kir ku di bin sîwana meclîsê de ava bû û diyar kir ku dûrî termînolojiya baskê desthilatdariyê, li maseya komîsyonê bi esasî li ser meseleya Kurd nirxandin hate kirin. Meral Daniş Beştaş got, “Li aliyê din, yek ji gavên dîrokî û girîng ew bû ku li Meclîsê ya ku temsîliyeke xurt lê heye, ji sedî 98 ê temsîlkaran li dora maseyekê rûniştin. Yanî ev gav ji rêzê nîne, pêşketinek e. Bêguman dema ku em vê dibêjin, em texmîn dikin ku raya giştî bi daxwazên me zane. Mînak me diyar kir ku divê ew komîsyon bi qanûnê ava bibe, lê belê bi banga Serokatiya Meclîsê pêk hat. Lê belê ev yek rastiya wê bi temamî bê qîmet an jî negirîng nake. Ji ber ku ev mase li derveyî pozîsyonên siyasî yên heyî, di ser pozîsyonên heyî re bû.”
Meral Daniş Beştaş destnîşan kir ku di asta heyî de divê gavên mezin bêne avêtin û axaftina xwe bi vî rengî dewam kir, “Mixabin avêtina van gavan jî bi êş e. Dil dixwest ev yek bê pirsgirêk bi rê ve biçûya, bersiv ji pirsên raya giştî bihata dayin. Lê belê divê em zanibin ku pêvajoyeke welê ye ku di nav de muxatabên welê hene ku bi rengê cuda li jiyanê dinihêrin, aliyên xwe yên cuda hene.
Mebesta min ne ew e ku ti pirsgirêk hîne û her tişt di rewşa heyî de weke ku tê xwestin tê meşandin. Ez dibêjim, dma ku mirov ev nirxand divê mezinahiya wê li ber çavan bigirin û binirxînin.”
Meral Daniş Beştaş ragihand ku êdî pêwîstiyeke lezgîn e ku pêvajoya çareseriyê li ser zemîneke qanûnî bê rûniştandin û diyar kir ku dema nîqaşan dirêj kir û gaveke şênber nehate avêtin, bêbawerî li nava gel mezin dibe. Lewma jî xwest ku pêvajo ji hesabên hilbijartinê re nebe qurban û gavên qanûnî bêyî dem derbas bibe divê bêne avêtin.
Parlamentera Erzîromê anî ziman ku divê mercên karkirin û ragihandinê yê Rêber Apo bêne sererastkirin ku muxatab û aktorê bingehîn ê çareseriyê ye û got, “Ji bo selameta pêvajoyê hem medya desthilatdariyê hem jî ya li muxalefetê divê zimanê xwe biguherînin.”
Meral Daniş Beştaş bal kişand ser hêviyên têkildarî teqwîma pêvajoyê û destnîşan kir ku ji bo sererastkirinên qanûnî divê beriya meha Tîrmehê ku Meclîs bikeve betlaneyê pêk were. Meral Daniş Beştaş ragihand ku hîn pêşnûmeyeke şênber nehatiye ser maseyê û ji bo zemîna hevparebûnê dem kêm maye. Parlamentera DEM Partiyê got, “Bendewariya min ew e ku meha Kanûnê em li ser vê pêşnûmeyê bixebitin. Niha li pêşiya me metnek nîne, lê belê em zanin ku pêşnûme amade ne. Divê em êdî zemîneke hevpar a li ser van pêşnûmeyan ava bikin. Meclîs wê Tîrmehê bikeve betlaneyê. Divê em vê çarçoveya qanûnî beriya betlaneyê teqez derxînin. Divê li nava tevahiya civakê bê belavkirin ku gel wê zerarê ji vê pêvajoyê nebîne, wê her kes bi ser bikeve.”
