Bi bangewaziya Platforma Saziyên Demokratîk re di çarçoveya 1’ê Sibatê Roja Cîhanî ya Piştgiriya Rojava de, li gelek bajarên Kurdistan û Tirkiyê meş hatin lidarxistin. Li Amedê jî gel li ber Bîrdariya Mafên Mirovan a li Parka Koşuyoluyê civiya û heta taxa Ofîsê ya navçeya Bajarê Nû meşiya.
Di meşa ku ku bi şîara “Rojava berxwedan e, azadî ye” hate lidarxistin de, girîngiya yekîtî û hevgirtina gelê Kurd hate ziman.
Welatiyên ku beşdarî meşê bûn ji ANF’ê re axivîn.
‘EM BI GELÊ XWE YÊ ROJAVA RE NE’
Gulşen Demîr: “Hûn dizanin, îro Roja Piştgiriya Rojava ye. Hemû Kurdistan û gelên cîhanê îro ji bo Rojava rawestiyane. Demek e êrîşên giran li ser gelê Rojava hene. Em li gorî paradîgmaya Rêber Apo afirandiye dixwazin van êrîşan têk bibin. Ji ber vê yekê hemû jinên li cîhanê dengê xwe bilind bikin. Em tu êrîşên li ser Rojava qebûl nakin. Em bi gelê xwe yê Rojava re ne. Bi taybetî dixwazin korîdorên alîkariyê bên vekirin.”
‘EM TENÊ AŞTÎ DIXWAZIN’
Ramazan Aktaş: “Armanca me tenê yekîtiya me ye. Îro em ji bo yekîtiya xwe li qadan in. Em azadiya gelê Kurd û li Rojava federasyonek dixwazin. Ji vir bang li hemû cîhanê dikin: Li kêleka gelê Kurd bin. Eger dewleta Tirk bi rastî aştiyê dixwaze, bi Kurdan re li ser bingeha xwîşk û biratiyê zû aştiyê pêk bîne. Em aştiyeke bi rûmet dixwazin. Em ziman, çand û welatê xwe dixwazin. Ev mafê me yê herî mezin e.”
‘DIVÊ ÊRÎŞ RAWESTIN, DERIYÊN SINOR VEBIN’
Arzu Karaman: “Ji bo êrîşên li ser Rojava rawestin îro em li qadan civiyan. Em dixwazin alîkariyên hatine berhevkirin bigihîjin Rojava. Dewleta Tirk divê zû sînor veke. Em ji bo azadiya Rêzdar Apo û gelê Rojava têdikoşin. Îro çar parçeyên Kurdistanê yek bûne û xwedî li Rojava derdikevin. Bang li hemû gelê xwe dikim: Em hemû bi hev re xwedî li Rojava derkevin.”
‘DIVÊ TIRKIYE JI VÊ ŞAŞITIYÊ VEGERE’
Mahmut Yıldız: “Tirkiye divê zû ji vê şaşitiyê vegere û deriyên sînor veke. Gelê Rojava tenê aştiyê dixwaze. Eger dewleta Tirk bi rastî samîmî be, divê sînoran veke. Em ê mafên gelê Kurd biparêzin. Em ê destûrê nedin ku gelê me yê li Rojava bê qetilkirin. Em ê ji bo Rojava li qadan bin. Hemû cîhan divê ji bo Rojava derkeve qadan.”
