Meclisa Sûriyeya Demokratîk (MSD) bi boneya salvegera 7’emîn a şehadeta sekretera giştî ya Partiya Sûriyeya Pêşerojê Hevrîn Xelef daxuyaniyek da.
Di daxuyaniyê de hat diyarkirin ku şehîd Hevrîn Xelef a sekretera giştî ya Partiya Sûriyeya Pêşerojê û endama Meclisa Serokatiyê ya Meclisa Sûriyeya Demokratîk bi destê çekdarên komên li Sûriyeyê yên girêdayî dewleta Tirk di 12’ê Cotmeha 2019’an de şehîd bû.
MSD’ê di daxuyaniya xwe de got, “Hevrîn Xelef ji girîngiya xebata xwe ya siyasî ya ji bo pêşxistina têkiliyên di navbera pêkhateyên civaka Sûriyeyê de bawer dikir. Di heman demê de wê ji girîngiya beşdariya jinan a di jiyana giştî de jî bawer dikir, rêwîtiya wê bi avakirina Sûriyeyeke demokratîk û pirreng hat girêdan.”
Di daxuyaniyê de hat diyarkirin ku prensîba girêdayî rêwîtiya Hevrîn Xelef a avakirina dewleteke demokratîk, pirreng û nenavendî, tê de beşdariya siyasî û ya jinan, di vê qonaxê de hîn heye.
Di daxuyaniyê de daxwaz hat kirin ku heqîqeta sûcê li dijî Hevrîn Xelef pêk hat bê eşkerakirin, sûcdar werin cezakirin, pêkanîna edaletê esasê qanûn û avakirina dewleteke demokratîk û pirreng e û rê jî li ber sûcan digire.
