Sala 2025’an ji bo Kurdistan û pirsgirêka Kurd bû sala ku pêvajoyeke pir girîng lê qewimî. Pêvajo bi “Banga Aştî û Civaka Demokratîk” a Rêber Apo destpê kir.
Piştî bangê, PKK’ê Kongreya xwe ya 12’an kom kir û biryara xwe ya fesixkirina xwe ragihand. Di meha Tîrmehê de merasîma şewitandina çekan hate lidarxistin. Piştre jî hate ragihandin ku hêzên çekdarî yên girêdayî PKK’ê, ji Tirkiyeyê vekişiyane.
Di aliyê Tirkiyeyê de jî di binesaziya Meclîsê de komîsyonek hate avakirin. Parlamenterên di vê komîsyonê de çûn Girava Îmraliyê û hevdîtin bi Rêber Apo re kirin. Bi vî rengî Rêber Apo ku Tevgera Azadiya Kurd wekî sermuzakerevan nîşan da, ji aliyê dewleta Tirk ve wekî muxatabê fermî hat qebûlkirin.
Lê tevî pêvajoyê jî di raya giştî de, bi taybet di gelê Kurd de nîşanên pirsê derbarê nêzîkatiya dewletê de dewam dike. Hevnûnerê DEM Partî yê Elmanyayê Faysal Sariyildiz ku ji sala 2016’an ve li Elmanyayê dijî û tevî civaka Kurd a dîasporayê xebatê dike, derbarê pêvajoyê de nirxandin kir.
Sariyildiz diyar kir ku divê qonaxa heyî ya pêvajoyê baş were fêmkirin û balê kişand ser hevokeke kurt a di notên hevdîtina dawî de. Sariyildiz anî ser ziman ku gotinên Rêber Apo yên, “Me bi têkoşîna xwe ya 50 salî, têkoşîna hebûn û rûmetê ya Kurdan da. Em bi ser ketin. Niha jî dora avakirina jiyaneke demokratîk a li Tirkiyeyê ye ku her kes bikaribe bi hev re wekhev û azad bijî” pêvajoyê vedibêje.
‘LI BAKURÊ KURDISTANÊ HIŞMENDIYEKE MUEZEM ÇÊBÛYE’
Sariyildiz destnîşan kir ku ev gotin li gorî 50 sal berê veguherîna li Kurdistanê nîşan dide. Sariyildiz bilêv kir ku ew ji demeke ku gotina ‘Ez Kurd im’ jî sûc bû, heta îro hatine û da zanîn ku li Bakurê Kurdistanê hişmendiyeke muezem çêbûye. Sariyildiz diyar kir ku tiştên ku li Rojava diqewimin, ne tenê ji bo Kurdan ji bo mirovahiyê jî şoreş e.
Faysal Sariyildiz destnîşan kir ku pêvajo beriya salekî bi banga “Bila çek bên danîn, li Meclîsê were axaftin” a Devlet Bahçelî destpê kir û got ku tê armanckirin ku çek êdî ji bûyîna amûra têkoşînê derkeve. Sariyildiz diyar kir ku dewlet tevî vê yekê jî bi heman cidîyetê bersivê nade û bi bîr xist ku gavên pêwîst hîna neavêtiye.
Sarilyildiz di berdewamiya axaftina xwe de da zanîn ku ji ber polîtîkayên êrîşkar a dewletê ku di 100 salên dawî de li dijî hemû daxwazên rewa, demokratîk û azadiyê yên gelê Kurd meşand, baweriya gel a ji bo dewletê pir qels e. Sariyildiz got ku divê piştî banga Rêber Apo a di 27’ê Sibatê de, merasîma şewitandina çekan û ragihandina biryara vekişînê ya hêzên girêdayî Tevgera Azadiya Kurd, ji bo pêşveçûna pêvajoyê zemîna hiqûqî û demokratîk were avakirin.
‘ÇALAKIYÊN GIRSEYÎ WÊ DEWLETÊ NEÇARÎ AVÊTINA GAVAN BIKE’
Sarilyildiz diyar kir ku dewletê pêvajoyê hîna wekî amûra bazar û şantajê digre dest û got ku destkeftiyên Rojava kirina mijara bazarê bêsûd e. Her wiha destnîşan kir ku li Rojava ji bo hemû gel û baweriyan jiyaneke wekhev û azad hatiye avakirin û pêwîstiya hemû Rojhilata Navîn bi vê heye.
Faysal Sariyildiz destnîşan kir ku wekî pêdiviyek pêvajoyê, divê gerîlayên li çiyayan, siyasetmedarên li sirgûnê û bi hezaran siyasetmedarên li girtîgehan werin berdan û tevlî têkoşîna qanûnî û demokrataîk bibin û bilêv kir ku li dijî vê hîna pêvajoyê kirina mijara bazarê pirsgirêkekî cidî ye.
Sariyildiz bi bîr xist ku di pêvajoyên ku çek ji bûyîna amûra têkoşînê derketiye de çalakiyên demokratîk ên girseyî diyarker in û destnîşan kir ku ev pêvajo wê li Kurdistanê bi hêza gel pêş bikeve û çalakiyên bi beşdariya sed hezaran wê dewletê neçarî avêtina gavan bike.
