Serokê berê yê Şaredariya Xinûsê û neviyê Şêx Seîd Hasan Basrî Firat têkildarî pêvajoya “Aştî û Civaka Demokratîk” ku di 27’ê Sibatê de bi banga Rêber Apo dest pê kir, axivî. Hasan Basrî Firat bi bîr xist ku pêvajo bi silavdayîna Serokê Giştî ya MHP’ê Devlet Bahçelî li hevserokên DEM Partiyê û daxuyaniyên wî yên piştî wê bi lez bû û bal kişand ser banga ji bo Rêber Apo û wiha got: “Helwesteke wiha, ku taybet ya lîderekî herî zêde li dijî gelê Kurd derdikeve, bû destpêkeke ku wate da pêvajoyê.”
‘BERSIVA OCALAN DI QADA NAVNETEWEYÎ DE DENG VEDA’
Firat diyar kir ku Rêber Apo bersiva bangê da û têkoşîna çekdarî bi dawî kir û da zanîn ku ev yek kêliyeke dîrokî ye. Firat destnîşan kir ku ev geşedan ne tenê li Tirkiyeyê, li Ewropa û di nav saziyên navneteweyî de deng veda û wiha got: “Cîhan vê gavê wekî firsendekî aştiyê dît û bang li Tirkiyeyê kir ku sererastkirinên hiqûqî bike.”
‘GELÊ KURD OCALAN WEKÎ ÎRADEYA XWE PEJIRAND’
Firat dilsoziya gelê Kurd a bi Rêber Apo re bi bîr xist û wiha got: “Gelê Kurd Abdullah Ocalan wekî nuner tayîn kiriye û wekî serok qebûl kiriye. Dilsozê gotina wî ne. Bêyî wî ev pêvajo bi tendurist nameşe.”
Firat diyar kir ku fesihkirina PKK’ê û bidawîkirina têkoşîna çekdarî ji bo vekirina rêya aştiyê biryareke dîrokî ye û destnîşan kir ku ji bo mayîndekirina vê pêvajoyê yek jî şertên herî bingehîn azadiya Abdullah Ocalan e.
Firat diyar kir ku bi deh hezaran kes di girtîgehan de mexdûrê vê şerê ne û bang kir ku têkildarî çareseriya pirsgirêka Kurd sererastkirinên hiqûqî bên kirin û wiha got: “Ez jî wekî bi deh hezaran kes, 9 sal in li sirgûnê me. Bidawîkirina van mexdûriyetan girîng e, lê cewhera meseleyê çareseriya pirsgirêka Kurd e. Garantiya ziman, çand û mafên bingehîn ên gelê Kurd çareseriya vê pirsgirikê ye. Çareseriyeke bi tendurist bi dayîna mafên gelê Kurd pêkan e.”
Firat bilêv kir ku hilweşîn û mexdûriyeta ji ber şer, 100 sal in dewam dike û destnîşan kir ku aştî hem ji bo Kurdan hem jî ji bo Tirkan neçarî ye û wiha got: “Kes şer naxwaze. Şer hilweşîn e. Divê dewleta Tirk jî êdî fêm bike ku çareseriya bi çek a vê pirsgirêkê tine ye. Kurd wê dev ji mafên xwe bernedin. Ji ber vê yekê divê ev pirsgirêk bi aştiyê were çareserkirin. Em ê her tim li kêleka aştî û mafan bin.”
