Pirtûk wê 29’ê Adarê li Frankfurtê di çalakiya Newrozê de li ser standa Pirtûkxaneya Meymanê bigihêje ber destê xwendevanan.
Pirtûka ‘Her Demsal Gulan’ ku qala yek ji pêşengên Tevgera Jinên Kurd Fîlîz Yerlîkaya (Gulan) dike û ji aliyê Newaya Jin ve ji çapkirinê re hate amadekirin, ji Weşanxaneyên Peyman hate weşandin.
“Gulan esmer bû, weke gelê xwe. Ma dibe ku mirov ewqasî bişibe welatê xwe? Welatek ewqasî zarokeke xwe dişibîne xwe? Bi hezkirin, hest, fikir, aqil û dewlemendiya dilê xwe mîna welatê xwe bû. Berxwedêrî, serketî û daxwaza xwe ya têkoşînê ji vê cografyayê wergirtibû. Kurdistan ji dîrokê herikîbû û xwe gihandibû wê!”
Ji bo çîroka jiyanê ya Gulan a bi nîşaneya Kurdistanê li bergê paşê yê pirtûkê hate vegotin, nivîskar Ladîn Irmak got, “Ji bo yên wê nas nekin dibe ku weke portreyeke îdealîzekirî bê dîtin” lê belê her ku pelên pirtûkê bêne qelibandin, ji zarokatiyê heta nefesa wê ya dawî qala çîroka jiyana wê dike Ladîn Irmak got, weke ku di dawiya pirtûkê de hate gotin, “Hûn li jineke xurt û taybet rast tên ku dikarin jê re bibêjin, xwezî niha li gel me bûya.”
Weke ku gotina ‘Azadî ji zarokatiyê destpê dike’ piştrast bike hîn di 8 salî de gava dest bi dibistanê kir, hewldana ferzkirinê ya şibandina her kesî bi gotina ‘dest nedin keziyên min’ red kir, dema ku birayê wê yê biçûk li dibistanê ji ber axaftina bi Kurdî lêdan xwar pûşiya ku jê re digot ‘êdî sembola Kurdîtiya min e’ li stuyê xw egerand û qet danexist, gava komkujiya Helebceyê bihîst çar rojan kete odeyê, ji xwarin û vexwarinê sar bû; li gel ku qet bi avjeniyê nizanîbû jî ji bo rizgarkirina hevrêya xwe ya li ber avê ket xwe berda nava avê; di salên herî zehmet ên şer de li hemberî birçîbûn, tinebûn û zehmetiyên fîzîkî li çiyayên Kurdistanê bû yek ji fermandarên artêşbûna jinê.
Ji bo bersivê bide komploya navneteweyî bû pêşenga ‘Hêzên Taybet’;
Jineke bi wijdan û hestewar bû ku li dijî paşverûtî û xiyanetê mîna Çiyayê Sîpanê serbilind bû, baweriya xwe bi azadiya jinê dianî û bi îrade bû.
Bi gotina hevrêyên wê, xwe bi kedê afirand, şoreşgerek bû, bal dikişand.
Li gorî dayika wê, keça çiyê bû, jê re digot, ‘Fîlîza min, kulîlka serê çiya ye, Sosina zozana ye’.
Wêneyê bergê yê pirtûkê ji ailyê gerîla Giyasettîn Gur bi nasnav Bawer Xebat ve hate amadekirin ku gerîla Bawer Xebat sala 2017’an li Herêmên Parastinê yên Medyayê şehîd bû.
Pêşgotina pirtûkê ji aliyê Sozdar Avesta ve hate nivîsandin. Mîna ku Sozdar Avesta got, “Ev pirtûk nîşanî jinên dilxwazê azadiyê dide ku li hemberî zor û zehmetiyan çawa dikarin bi ser bikevin, çawa dikarin li ser piyê xwe bisekinin, xwe bi rêxistin bikin.”
Pirtûka ku bi tevkariya Newaya Jin hate amadekirin, 29’ê Adarê li Frankfurtê wê di çalakiya Newrozê de li ser standa Pirtûkxaneya Meyman be. Pirtûk her wiha ji navnîşana pirtukxane.net jî dikare bê peydakirin.
