Endamên koma xebatê û raportorên taybet ên Neteweyên Yekbûyî, bi daxuyaniyeke hevpar bang li Tirkiye û PKK’ê kirin ku ji bo çareseriya aştiyane dest bi hevdîtinan bikin û li gorî rêgezên hiqûqa navneteweyî tevbigerin.
Pisporên Neteweyên Yekbûyî, diyar kirin ku tevî ragihandina agirbestê ji aliyê PKK’ê ve, Tirkiye bi hinceta li Sûriyeyê û Iraqê li hedefên PKK’ê dixe, êrîşên hewayî pêk tîne û hat gotin ku ev operasyon di çarçoveya “qedexeya bikaranîna hêzê” ya navneteweyî de dibe sedema pirsgirêkan.
Pisporên Neteweyên Yekbûyî agirbestên demkî yên berê bêencam mane jî bibîr xistin û destnîşan kirin ku divê alî gavên pêbawer bavêjin. Pisporan, anîn ziman ku di dema pevçûnan de binpêkirinên cidî yên mafên mirovan û hiqûqa mirovî, bi taybetî li dijî sivîlan pêk tên û “peymaneke aştiyê ya berfireh” ku ji ezmûnên aştiyê yên erênî yên li herêmên şer hatine bidest xistin bi çend xalan pêşniyar kirin:
1. Bêçekkirin, berdan, ji nû ve tevlîkirina nava civakê û efû/kêmkirina cezayan.
2. Edaleta veguhêz: eşkerekirina rastiyan, lêkolînên bêalî, cezakirin, tazmînata qurbaniyan.
3. Piştgiriya ji bo mexdûran: Alîkariya aborî, parastin, lêgerîna windayan, vegerandina cenazeyan û xebatên hişyarkirinê civakî
4. Reforma sektora ewlekarî, sazî û rêveberî.
5. Verastkirinên pêkhatî yên ku sedemên bingehîn ên tundûtûjiyê çareser dikin.
Pisporên Neteweyên Yekbûyî, pratîkên erênî ên di têbiniya Rêbernameya 2023’yan ya derbarê edaleta veguhêz de bibîr xist û ji bo çareseriya bilez a pevçûnê û pêkanîna peymana aştiyê bang li civaka navneteweyî hat kirin ku gavan bavêje. Pisporan her wiha dan zanîn ku, wan beriya niha li ser mijara şerê di navbera PKK’ê û Tirkiyeyê de bi rayedarên Tirkiyeyê re hevdîtin kirine.
