Hêzên Sûriya Demokratîk (QSD) salvegera rizgarkirina bajarokê Baxozê bi pîrozbahiyekî pîroz kir. Şahî li bîra El Omer a Dêrazorê bi beşdariya fermandarên QSD’ê û Meclisa Leşkerî ya Dêrazorê, şêx û rûspiyên eşîran, endamên saziyên Rêveberiya Xweser û şandeyek ji hêzên Koalîsyona Navneteweyî hat organîzekirin.
Li qada şahiyê wêneyên şehîdên QSD’ê, al û diruşma hatin daliqandin.
Di şahiyê de Fermandarê Fermandariya Giştî ya QSD’ê Luqman Xelîl axivî û diyar kir ew bi serkfetinên ku bi saya fedakariyên şehîdan hatine bidestxistin serbilind in û ji bo geşkirina ewlehiya Sûriyeyê û rûbirûbûna rêxistinên terorîst banga hevgirtina navneteweyî kir.
Xelîl diyar kir ku li hember astengiyên mezin ên li pêşberî gelê Sûriyeyê pêwîstî bi hevgirtineke xurt heye.
Xelîl anî ziman ku dosyaya çeteyên DAÎŞ’ê hîna gefên cidî ne û ji bo bidawîkirin û têkbirina terorê û misogeriya mayînde ya ewlehî û aştiyê pêdivî bi hevkariyeke navneteweyî ya rasteqîn heye.
Şêxê eşîra El Bocamil şêx Emar El Hedawî jî got ji bo edalet û azadî pêk were nenavendî çareserî ye û banga yekitiya niştîmanî û sekna li hember hewldanên parçebûna Sûriyeyê kir.
Hevseroka Meclisa Malbatên Şehîdan Felek Osman jî got ew li gorî erka xwe ya parastina destkeftiyên şehîdan tev digerin.
Ji fermandarên Meclisa Leşkerî ya Dêrazorê Nûrî Xelîl got hêzên wan di serdegirtina şaneyên DAÎŞ’ê û parastina herêman de bi îsrar in.
Di dawiyê de rêvebera Kombûna Jinan a Zenûbiya ya kantona Dêrazorê Xîtam El Salih axivî û got: “Di salvegera rizgarkirina Baxozê de em bi vê serkeftina dîrokî pîroz dikin. Gelê me demeke dirêj rûbirûyî zilm û êşan hat, lê bi saya hevgirtina me, ev serkeftina gewre hat bidestxistin.”
Şahî bi gerandina dîlanan bi dawî bû.
