Rêxistina Efûyê ya Navneteweyî careke din ji ber ku Îsraîlê komkujî pêk anîne, ew şermezar kir.
Sekreterê Giştî yê Rêxistina Efûyê ya Navneteweyî Agnes Callamard di pêşgotina rapora salane de got: ‘’Cîhan ji 7’ê Cotmeha 2023’yan ve ye ku Hamasê li hemberî welatiyên Îsraîlê sûcên mezin kirin û zêdetirî 250 kes jî rehîn girtin, li ser ekranên televîzyonê komkujiyeke zindî temaşe dike.’’
Agnes Callamard ev yek jî anîn ziman: ‘’Dema ku Îsraîlê bi hezaran Filîstînî kuştin, malbat qetil kirin û çavkaniyên debarê, dibistan û nexweşxane tune kirin cîhanê temaşe kir.’’
Rêxistina Efûyê di beşa rapora xwe ya têkildarî Rojhilata Navîn de sûcdarkirinên ‘’komkujiyê’’ dubare dike. Rêxistina Efûyê di dawiya sala 2024’an de Îsraîl sûcdar kiribû ku komkujî pêk aniye lê belê Îsraîlê ev yek red kiribû.
Di raporê de hate destnîşankirin ku lêkolînên Rêxistina Efûyê ya Navneteweyî nîşan dide ku Îsraîlê çalakiyên ji aliyê Peymana Komkujiyê hatine qedexekirin, bi armanca tunekirina nifûsa Xezeyê û pêkanîna komkujiya bi zanebûnî li dar xistine.
Hêjayî bibîrxistinê ye ku di meha Çileyê de her du aliyan li ser agirbesteke du mehî ki hev kiribû lê belê piştre Îsraîlê Hamas sûcdar kir ku hemû rehîneyên di destê xwe de bernedane û di 18’ê Adarê de li herêmê dubare dest bi êrîşên leşkerî kiribû.
Her wiha rayedarên Filîstînî dan zanîn ku Îsraîlê şeva 28’ê Nîsanê li başûrê Şerîda Xezeyê li hemberî konên welatiyan êrîşek pêk aniye û di encama êrîşa berbehs de çar kesan jiyana xwe ji dest dane.
