Şaxê Komeleya Hiqûqnasên Ji Bo Azadiyê (OHD) ya Enqereyê, Hiqûqnasên Ji Bo Edaletê, Hiqûqnasên Ji Bo demokrasiyê, Hevgirtina Hiqûqnasan, Hiqûqa Civakî û Şaxa Komeleya Mafên Mirovan (ÎHD) a Enqereyê, têkildarî lêpirsîna der barê mirina Poyraz Esenê de ku li Girtîgeha Jinan a Sîncanê bi awayekî biguman jiyana xwe ji dest dabû, daxuyanî dan.
Di civîna çapemeniyê de ku li avahiya Şaxa ÇHD a Enqereyê hat lidarxistin, Rêvebera ÇHD’ê Nilûfer Irmak Ozkan axivî. Nîlufer Irmak Ozkanê diyar kir ku mêrên trans bêyî rizaya wan tên îzolekirin û li qawîşa G-3’yan tên bicihkirin û got: “Li vî qawîşa ku wekî cihê êşkenceyê hatiye sêwirandin, di dîrokên cuda de çar mêrên trans ên xwestin tedawiya hormon replasmanê bibînin li vir hatine bicihkirin. Çendî bê îdiakirin ku armanca avakirina vê qawîşê ji bo domandina pêvajoya zayendî ya mêrên trans e jî, lê kesên li vê qawîşê tên bicihkirin nikarin pêvajoya guherîna zayendî bidomînin û ji mafên beşdariya li kursan an jî werzîşa hevpar bêpar tên hiştin.”
Nîlufer Irmak Ozkanê da zanîn ku çar girtiyên di qawîşa G-3’yan de di 1’ê Kanûna 2025’an de sewqî serwîsa psîkyatriyê ya Nexweşxaneya Kampusê hatine kirin û got: “Di vê navberê de Poyraz ji hucreya ku sê roj bûn tê de bû hatiye derxistin û ew birine qawîşa G-3’yan. Ên ji nexweşxaneyê vegeriyan gava ketine qawîşê dîtine ku Poyraz daliqandî ye. Piştî Serdozgeriya Komarê ya Enqereyê bi awayekî fermî mirina Poyraz ragihandiye, di 3’yê Kanûna 2025’an de lêpirsîn hatiye destpêkirin. Dozgerî di 29’ê Nîsana 2026’an de tevî hemû delîlan û binpêkirinên giran jî dosye girt û midûrê saziyê ku wekî gumanbar îfadeya wî hat girtin û karmendên înfazê yên din û xebatkarên tenduristiyê li derî vê hiştiye. Dozgerî, mirina kesekî ku di bin çavdêriya dewletê de nixumandiye. Em wekî rêxistinên hiqûqê, em ê doza Poyraz bişopînin. Heya ev rejîma tecrîdê bê hilweşandin û hemû berpirs bên darizandin em ê têkoşîna xwe bidomînin.”
