Sakîne Cansiz (Sara), Fîdan Dogan (Rojbîn) û Leyla Şaylemez (Ronahî) ku di 9’ê Çileya 2013’an de li paytexta Fransayê Parîsê, Emîna Kara (Evîn Goyî) a li Parîsê û Sêvê Demîr, Fatma Uyar û Pakîze Nayir ên li Silopiya ya Şirnexê hatibûn qetilkirin, li gelek bajaran hatin bibîranîn.
AMED
Li Amedê ji bo siyasetmedarên Kurd li Navenda Çandê ya Dîcle Firatê çalakiya bîranînê hate lidarxistin. Dayika Sêvê Demîr a hatî qetilkirin Sakîne Demîr, hevşaredarên navçeyan, nûnerên partiyên siyasî, Dayikên Aştiyê, saziyên jinan û gelek jin tevlî bîranînê bûn. Di daxuyaniyê de timî dirûşmên “Jin, jiyan, azadî” û “Bijî Serok Apo” hatin berzkirin.
Di bîranînê de ku wêneyên kesên li Parîs û Silopyayê hatin qetilkirin hatin hilgirtin, qurnefîl û find danîn ber wêneyên wan. Bîranîn bi deqeyek rêzgirtina ji bo jinên hatin qetilkirin dest pê kir. Di bîranînê de sînevîzyona ku têkoşîna wan anî ziman hatin nîşandan. Der barê jinên ku hatin qetilkirin axaftin hatin kirin, helbest hatin xwendin.
ÎZMÎR
Tevgera Jinên Azad (TJA) û Meclisa Jinan a Partiya Wekhevî û Demokrasiyê ya Gelan (DEM Partî) li Îzmîrê bi çalakiyekê siyasetmedarên jin ên Kurd ên hatin qetilkirin bi bîr anîn. Gelek jin beşdarî çalakiya ku li avahiya Rêxistina DEM Partiyê ya Îzmîrê hat lidarxistin bûn. Bîranîna ku wêneyên jinan tê de cih girt, bi deqeyek rêzgirtinê dest pê kir. Di merasîmê de jinan gelek caran dirûşmên “Şehîd Namirin” û “Jin jiyan azadî” berz kirin.
ÊLIH
Li Êlihê jî li Bûlwara Koçerlerê daxuyanî hate dayin û jinên hatin qetilkirin hatin bibîranîn. Hevşaredarên Êlihê Gulistan Sonuk û Yeşîl Işik, aktîvîstên TJA’yê, endamên Meclisa Dayikên Aştiyê, rêveberên DBP û DEM Partiyê yên bajar û gelek kes tevlî bûn. Di daxuyaniyê de wêneyên jinên hatin qetilkirin û pankarta “Ji Sarayan heta Sêvêyan têkoşîna azadiyê ya jinan li her derê ye” hatin hilgirtin.
Di daxuyaniyê de axaftin hatin kirin û hate gotin ku dê çi şert û mercan de dev ji têkoşîn û berxwedanê bernedin û di rêya jinên hatine qetilkirin de rêya xwe bidomînin.
Daxuyanî bi dirûşma “Jin, jiyan, azadî” bi dawî bû.
SÊRT
Li Sêrtê jî li avahiya DEM Partiyê ya bajar bîranîn hat lidarxistin. Parlamenterê DEM Partiyê Sînan Çîftyurek, aktîvîstên TJA’yê, endamên Meclisa Dayikên Aştiyê, rêveberên DBP û DEM Partiyê yên bajar û gelek kes tev li bûn. Di bîranînê de têkildarî têkoşîna jinên hatine qetilkirin sînevîzyonek hate nîşandan.
Bîranîn, bi dirûşma “Jin, jiyan, azadî” bi dawî bû.
