Hevserokê Giştî yê berê yê HDP’ê Selahattîn Demîrtaş ku li Girtîgeha Tîpa F a Edîrneyê tê girtin, bi bavê Narîn Guran, Arîf Guran û birayê wê Baran Guran re hevdîtin kir û derbarê hevdîtinê li ser hesabê xwe yê X’yê daxuyaniyek belav kir.
Selahattîn Demîrtaş, di daxuyaniya xwe de diyar kir ku wî dosyaya Narîn Guran weke hiqûqnasekî lêkolîn kiriye û wiha got, “Di dosyayê de yê ku sûcê wî bi delîlan hatiye ispatkirin tenê Nevzat Bahtiyar e. Di dosyayê de dayika Narîn Guran Yuksel Guran, apê wê Selîm Guran û birayê wê Enes Guran jî hatine girtin. Ev yek karesata hiqûqî ye. Diyar e ku dadgeh ji agahiyên li ser çapemeniyê bandor bûye lê li gor hiqûqê ji bo cezakirinê divê delîl û ispat hebin. Ji bo wê jî divê di kontrolên Îstînaf û Dadgeha Bilind de ev ceza bên xirakirin. Di serî de ez bang li Baroya Amedê û li hemû sazî û dezgehên hiqûqê dikim ku ji bo edalet pêk were di nava hewldanê de bin. Ez ji Wezaretê Dadê jî rica dikim ku vê dosyeyê bi awayekî birêkûpêk lêkolîn bike û bi daxwaza xirakirinê serî li Dadgeha Bilind bide.”
