Rêxistina Mafên Mirovan a Dîdebanê, bîlançoya tundiyê ya mehekê amade kir. Li gorî raporê, li Îran û Rojhilatê Kurdistanê di nav meha borî de herî kêm 26 jin hatine kuştin.
Rêxistina Mafên Mirovan a Dîdebanê, ku bi taybetî li ser mijarên girêdayî jinan dixebite, bîlançoya kuştina jinan a meha borî ya li Rojhilatê Kurdistan û Îranê belav kir. Di raporê de hate ragihandin ku di nava meha borî de li herêmên cuda herî kêm 26 jin hatine kuştin.
Di raporê de, hate diyarkirin ku piraniya qurbaniyan ji aliyê hevjînên xwe, hevjînên berê, xwazgînî, zarok, xizm, hevkarên xwe ve yan jî bi mebesta diziyê hatine qetilkirin. Li gorî daneyan:
*12 jin ji aliyê hevjînên xwe ve hatine kuştin.
*Jinên din ji aliyê hevjînên berê, xwazgînî, kur, nevî, hevkar û xizmên nêzîk ve hatine kuştin.
*Her wiha 3 jin ku yek ji wan zaroka 16 salî bû ber bi întîharê ve hatine dehfdan.
Rêxistinê, da zanîn ku sedem û hincetên van dosyayan bi taybetî wekî ‘dijderketina hevberdanê’, bi navê ‘namûsê’, ‘redkirina daxwaza zewacê’, ‘pirsgirêkên malbatî’ yan jî ‘dizî’ hatine destnîşankirin.
