Şêniyên bajarê Kobanê û gundewarên wê bi merasîmekê şervanê Hêzên Sûriyeya Demokratîk (QSD) Ebdulkerîm El Hemed li Pakrewangeha Şehîd Dicle hat oxir kirin.
Şervanê QSD`ê Ebdulkerîm El Hemed ji navçeya Sirîn ye, duh (28 Tîrmeh) di encama nexweşiyê de şehîd bû.
Merasîmê oxirkirinê bi deqeyeke rêzgirtin dest pê kir, paşê Hevseroka Meclisa Malbatên Şehîdan a Bajarê Kobanê Sara Xelîl axivî û wiha got: “Şehîd Ebdulkerîm El Hemed yek ji şervanên ku di mijara parastina gelê de dudilî nebû, ew li ser şopa şehîdan xebata xwe dida meşandin û yek ji şervanên pêşeng yên eniyê şer bû. Ew ji bo parastina xak û welatê xwe dest ji zarok û malbata xwe berdan, heta vê rojê jî têkoşiya.”
Endamê Rêveberiya Akademiya Leşkerî ya QSD`ê Feyad Şahîn jî bi navê Hêzên Leşkerî axivî û hemû şehîdên ku ji bo ewlehiyê û rûmetê têkoşiyan bi bîr anî.
Feyad Şahîn diyar kir ku têkoşîn û berxwedana Şehîd Ebdulkerîm El Hemed beşdarî hemû hemleyên leşkerî yên li herêmê bû û ew di berpirsyartiya li ber welatê xwe mînakek bû.
Feyad Şahîn da zanîn ku Şehîd Ebdulkerîm El Hemed li bermaberî dîtina perwerdeyên îdyolojî û leşkerî dudilî nedibû, heta dawiya jiyana xwe li ser xeta xwe ya welatparêziyê meşiya. Ew ê heta dawiyê li ser şopa şehîd bimeşe.
Piştî xwendina wesîqeya şehadetê ya Şehîd Ebdulkerîm El Hemed û radestkirina wê ji bo malbatê, beşdarên merasîmê cenazeyê şehîd bi tilîlî û slogana “Şehîd Namirin” spart axê.
