Meclisa Malbatên Şehîdan a bajarê Dêrikê ji bo şervanên QSD’ê Delîl Rimêlan (Casim Mihemed Remedan) û Şervan Koçer (Mîzer Qasim) yên ku 7’ê Çileyê û Şahîn Çilaxa (Udey El Xerawî) yê 14’ê Çileyê li Bendava Tişrînê şehîd bibûn, merasîmeke xiyabî li dar xist.
Merasîm bi beşdariya bi sedan kesî li qada Navenda Ciwanan a Şehîd Bawer a bajarê Dêrikê hat lidarxistin.
Piştî rêzgirtin, ji rêveberên Meclisa Malbatên Şehîdan Cemîl Çilaxa axivî. Cemîl Çilaxa di axaftina xwe de behsa hevgirtina pêkhateyên herêmê kir û got: “Di xendeqên berxwedana li hemberî êrişên artêşa Tirk a dagirker û çeteyên wê de xwîna Kurd û Ereban tev li hev bûn. Hevgirtina me wê serkeftina me mîsoger bike.”
Ji fermandarên QSD’ê Mihyedîn Xêrkê jî anî ziman ku dê parastina tevahî pêkhateyên Bakur û Rojhilatê Sûriyeyê ji êrişan bidomînin.
Piştî axaftinan wesîqeyên hersê şehîdan hatin xwendin û radestî malbatên wan hatin kirin. Merasîm bi berzkirina dirûşmên dilsoziya bi şehîdan re bi dawî bû.
