Aysel Dogan ku endama “Koma Aştiyê ya Duyemîn” bû ku ji bo çareseriya pirsgirêka Kurd di pêvajoyên beriya niha de ji Ewropayê hat Tirkiyeyê û piştre jiyana xwe ji dest da, ji aliyê aktîvîstên Tevgera Jinên Azad (TJA), Komeleyên Elewiyan ên Demokratîk, nûnerên DEM Partiyê û gelek kesî ve hate bîranîn.
Piştî deqeyeke rêzgirtinê Parlamentera Dersimê ya DEM Partiyê Ayten Kordû axivî û diyar kir ku Aysel Dogan jiyana xwe da têkoşîna edalet û aştiyê.
Ayten Kordû got, “Ji bo jiyana bi rûmet a gelê Kurd û gelên Tirkiyeyê jiyana xwe da. Ji bo Dersimê kedeke mezin da. Xwezî îro di nava ma de bûya û pêvajoya aştiyê bidîta. Wê tevkariyên cidî li avakirina pêvajoyê bikira.”
Ayten Kordû diyar kir ku Aysel Dogan heqîqet, nasname û baweriya Dersimê diparast û soz da ku têkoşîna wê bi “Aştî, civaka demokratîk û azadiyê tacîdar bikin.”
Hevserokê Dersimê yê DEM Partiyê Ozcan Ateş jî di axaftina xwe de diyar kir ku Aysel Dogan ji bo ziman, bawerî û nasnameya xwe berdêlên giran da.
Di bîranînê de parî hatin payêkirin û qurnefîl li ser gorê hate danîn.
Piştî bîranînê serdana gora Sakîne Cansiz hate kirin ku yek ji damezrînerên PKK’ê bû û 9’ê Çileya 2013’an li Parîsê hate qetilkirin. Aktîvîstan qurnefîl danîn ser gora Sakîne Cansiz.
