Partiya Demokrasî û Wekheviyê ya Gelan (DEM Partî), wê di 16’ê Gulanê de bi dirûşma “Gavek ji bo aştiyê” li gelek bajaran meşan lidar bixe. Têkildarî meşê, li avahiya Rêxistina DEM Partiyê ya Amedê daxuyanî hat dayin. Rêveber û endamên partiyên siyasî, saziyên sivîl ên bajêr û gelek kes tevlî civînê bûn. Di daxuyaniyê de bi zaravayê Kurmancî yê Kurdî û bi zimanê Tirkî pankarta “Gavek ji bo aştiyê” hat daliqandin. Kurdiya metna daxuyaniyê ji hêla Hevserokê DEM Partiyê yê Amedê Abbas Şahîn û Tirkiya wê jî ji hêla Hevseroka Partiya Herêman a Demokratîk (DBP) a Amedê Rûçem Vefa Elyakut ve hate xwendin.
Daxuyanî wiha ye:
“Ji Banga Aştî û Civaka Demokratîk a 27’ê Sibatê ya birêz Abdullah Ocalan heta niha 15 meh derbas bûn. Lê di halê hazir de desthilatdariyê ji bo daxwaz û israra aştiyê ya gelê Kurd, gelên Tirkiyeyê, jinan, ciwanan, kedkaran, karkeran û bêkaran tu gaveke şênber neavêtiye. Komîsyona li Meclîsê hatiye avakirin her çend guh dabe dînamîkên civakî û li ser vê pêvajoyê raporek amade kiribe jî hîn jî daxwaza aştî û demokratîkbûnê pêk nehatiye. Desthilatdariya siyasî û dewlet, her tim di nava helwesteke taloqkirinê de ye. Lê hewce ye li hemberî daxwazên civakê, di çarçoveya ruhê pêvajoyê de û ji bo bikaranîna vê firsenda dîrokî demildest berpirsyartiyê li xwe bigire.
Ji bo encamgiriya Pêvajoya Aştî û Civaka Demokratîk, şertê sereke ew e ku xitimîn û nezelaliya heyî ji holê were rakirin.
Di qonaxeke wiha dîrokî de mezinkirina têkoşîna aştî û demokratîkbûnê, erkekî bivênevê yê hemû dînamîkên civakê ye. Aştî, zemîna herî xurt a hevpar e ku nasname, bawerî û nasnameyên siyasî yên cuda tîne cem hev. Berpirsyariya me hemûyan ew e, em zemîna aştiyê mezin û xurt bikin û aştiyê civakî bikin.
Bi vê berpirsyariyê; em gelê xwe vedixwînin meşê ku wê di 16’ê Gulanê roja Şemiyê saet di 19.00’an de bi dirûşma ‘Gavek ji bo aştiyê’ were lidarxistin. Meş wê li Quncê Jêr ê Girtîgehê ya navçeya Rezanê destpê bike û heta ber AZC Ofîsê dewam bike.”
