Li Sûriyeyê piştî hatina hikûmeta veguhêz Sûriyê bi guhertin û veguhertinên cur bi cur re derbas bû. Bi taybet li ser gelên Elewî û Durzî gelek komkujî pêk hatin. Li berava Sûriyeyê bi hezaran kes hatin qetilkirin, bi sedan jin rastî tundî û destdirêjî hatin. Di heman demê de bi hezaran kes ên ku li berava Sûriyeyê rûdiniştin ji bo ewlehiyê berê xwe dan herêmên Rêveberiya Xweser û li wir bi cih bûn.
Di demên dawî de bûyerên ku li Suwêydayê rû da li ser gelên Sûriyê bandoreke neynî çêkir. Ji kuştin, lêdan, revandin û gelek şêwazên kuştinê yên cur bi cur derketin holê.
Li Siwêdayê gelek jin di êşkencê re derbas bûn. Jinên mûzîkjen, lîstokvanê fîliman, bijîşk û parêzer jî hatin kuştin. Lê dîsa jî gelê Suwêydayê li ber xwe da û rêveberiya xwe ya xweser îlan kir.
Têkildarî vê mijarê Hevseroka Desteya Edaletê ya Kantona Firatê Rewşen Haçim got: “Gel di nava hêviyekê de bû, ew şoreşa Sûriyê ya ku bi salane li hemberî wê rêjîma ku revandin, qirkirin, kuştin û wendakirinê dikir hatibû çêkirin. Lê bi hatina HTŞ’ê re gel bi rastiyek din re rû bi rû ma. Hêviya gel azadî, wekhevî û di nava jiyaneke adîl de bi hev re jiyankirin bû. Lê piştî hikûmeta veguhêz hat ser desthilatdariyê, piştî çend mehan him li perava Sûriyeyê û him jî li gelek herêmên din destbi bi gelek komkujiyan kirin.”
Rewşan anî ziman ku divê lêpirsîn bê kirin û got: “Li cihê van bûyeran, divê dest bi lêpirsînê were kirin. Li Siwêydayê gelek komkujî hatin kirin û dîmenê van komkujiyan li ser medya dijîtal hatin parvekirin. Gelek malbat hatin kuştin û gelek kes hatin şewitandin, dîsa li wir hemberî jinê êrîşên herî hovane hatin kirin. Zêdetirî 600 jin di van deman de hatin kuştin. Ev sûcê şer e. Hêvî hebûn ku ev kes bên cezakirin. Ev jî li gorî zagonan e. Lê mixabin li her derê bêdengiyek hebû, tenê şermezarkirin çêbû û tu dengek cuda derneket.”
Rewşen Haçim diyar kir ku hikûmeta ku niha li ser desthilatê dixweze yek netew, yek ziman û yek al tenê hebe û wiha got: “Bi van kiryarên hikumeta veguhêz pêşî li şerê di navbera ol û mezheban tê vekirin. Divê cudabûn nekeve di navberî netewên din. Destûra Sûriyê ya nû jî di nav xwe de hemû netewên din paşguh kir. Ligel ku di nav civakê de rola jinê rolekî sereke ye jî, di destûra Sûriyeyê de nayê nasîn.”
Rewşen anî ziman ku wê qeyrana Sûriyê bidome û çareseriya Sûriyê jî bi modela rêveberiya xweser pêkan e û wiha dawî li axaftina xwe anî: “Piştî damezrandina Rêveberiya Xweser a Suwêydayê hat dîtîn ku îlham ji şoreşa jinê girtine. Di demên dawî de li Suwêydayê jinan jî çek rakiribûn. Ev yek nîşan dide ku îlham ji şoreşa Rojava girtine. Lewma şoreşa Rojava ji hemû jinên cihanê re bûye cihê îlhamê. Îro jî jinan li Suwêydayê xwe di bin wê banê de birêxistin dikin û çeka xwe parastinê radikin.”
