Parlamentera Mûşê ya DEM Partiyê Sumeyye Boz têkildarî tecrîda li ser Rêberê Gelê Kurd Abdullah Ocalan ku demeke dirêj e dewam dike, ji ANF’ê re axivî.
Sumeyye Boz anî ziman ku tecrîdeke mutleq li ser Ocalan tê ferzkirin û got, “Çaryek sedsal e li ser Birêz Ocalan tecrîdek heye; pênc sal in ne malbat ne jî parêzer dikarin wî bibînin; sê sal in bi rengekî mutleq têkilî hatiye qutkirin. Me gelek caran got, aliyekî hiqûqî yê vê mijarê nîne. Lê belê ji aliyê hiqûqî ve jî mirov binirxîne wê bê dîtin ku binpêkirineke cidî heye, mafê hêviyê tine tê hesibandin. Aliyekî exlaqî yê mijarê jî heye; ji ber ku ev alî bi taybetî ji bo gelê Kurd gelekî girîng e. Bi milyonan mirovî ji bo Birêz Ocalan gotin ‘îradeya min e’, weke Rêber ji xwe re qebûl dikin. Lewma her kiryara li hemberî Birêz Ocalan pêwendiya xwe yekser bi pirsgirêka Kurd û gelê Kurd re heye.”
NEÇARESERÎ BI KÊRÎ GELAN NAYÊ
Sumeyye Boz diyar kir, ew bi zîhniyeteke bi wî rengî re rû bi rû ne ku pirsgirêka Kurd bêçareserî dihêle, di neçareserkirinê de israr dike û got, “Ev yek bi kêrî berjewendiyên gelan nayê. Eger wê qala berjewendiyekê bê kirin ev yek jî berjewendiya wan bi xwe ye. Eger berjewendiyên gelan li ber çavan bigirtibûna li şûna kûrkirina krîza piralî ya ku gel di nav de ye wê ji bo çareseriyê gav biavêtibûna. Wê berê xwe bidabûna danûstandinên sala 2013’an. Lê belê tê dîtin û em zanin ku bi tecrîda li ser Birêz Ocalan re dixwazin desthilatdariya xwe dewam bikin, jiyana bi hev re ya gelan tine bihesibînin û xizmetê ji şer re bikin.”
TÊKOŞÎNA HEBÛNÊ YA GELÊ KURD
Sumeyye Boz destnîşan kir ku gelê Kurd ji bo hebûnê têdikoşe û got, “Lê belê li hemberî vê têkoşîna hebûnê bi sedan sal in polîtîkayên înkar û îmhayê tê meşandin. Di nava vê têkoşîna hebûnê de destê aştiyê, daxwaza aştiyê, gotina aştiyê heye. Lê belê desthilatdarî bi şer bersivê dide vê yekê, şer giran dike. Tê dîtin û em zanin ku ev şer bi kêrî kesî nayê. Lewma divê bi danûstandinê bersiv ji vî şerê hebûnê û daxwaza aştiyê ya bi rûmet a gel re bê dayin. Tecrîda ku li Girtîgeha Îmraliyê destpê kiriye li hemû girtîgehan û tevahiya welêt belav bûye, lewma ji gelek aliyan ve bandorê li civakê dike. Ji aliyê civakî, aborî, ekolojîk û siyasetî ve bandorê li civakê dike. Ji aliyê civakî ve bandorê lê dike, ji ber ku jiyana bi hev re ya çand û gelan bi rêya vê polîtîkayê tê tinekirin yan jî civak li hemberî hev têne rakirin û şer tê kûrkirin. Têkiliya van aliyên ji hev cuda mixabin bi rêbazeke aştiyane pêk nayê. Êriş li ser çand, ziman û dîrokê tê kirin. Herî dawî ciwan ji ber govendê hatin binçavkirin û êşkence li wan hate kirin. Hişyariyên bi Kurdî yên trafîkê ku şaredariyan nivîsandibûn hatin jêbirin. Serdegirtin li dawetan hate kirin û heman kiryar li hemberî kesên ku destmalên kesk, sor û zer hilgirtin hate ferzkirin.”
TECRÎD BANDORÊ LI GELÊN TIRKIYEYÊ HEMÛYAN DIKE
Sumeyye Boz anî ziman ku şert û mercên tecrîdê her roj hîn giran dibin û got, “Dema ku mijar dibe Birêz Ocalan û Kurd, mijar dibe îradeya gelê Kurd, têkoşîna hebûnê, meseleya statuyê, têkoşîna nasname, çand û azadiyê ya gelê Kurd nêzîkatiyeke jinedîtî hatinê tê nîşandan. rejîma tecrîdê ji pirsgirêka Kurd cuda nîne. Li aliyê din pêvajoya ku niha li Fîlîstînê dewam dike û daxwazên gelê Kurd gelekî dişibin hev. Dema ku li ser vê mijarê em rexneyan dikin, fikrê xwe dibêjin û polîtîkaya durû radixin pêş çavan, gelekî aciz dibin. Em dibînin ku dijminatiyeke cidî li hemberî Kurdan heye. Ji ber vê jî Şerê Îsraîl-Fîlîstînê hem durûtiya desthilatdariyê nîşanî me dide hem jî helwesta partiyên din ên siyasî jî eşkere dike. Lewma dema ku em vê nêzîkatiya dualî bi şênberî radixin pêş çavan gelekî aciz dibin, lê belê em ê wan timî aciz bikin.”
Sumeyye Boz destnîşan kir ku partiyên din ên siyasî jî parçeyek ji vê durûtiyê ye û got, “Ji bo dawî li vê rejîma tecrîdê bê anîn ne tenê siyasî, bi esasî divê gel bi rengekî topyekûn li ber rabe. Di beşeke ji axaftina xwe de min gotibû; tecrîd ne tenê li ser beşekê ye, li dijî tevahiya civakê ye, li hemberî gelên li Tirkiyeyê hemûyan e. Ji ber vê jî wezîfe ne tenê dikeve ser milê siyasiyan, wezîfe ya gelan hemûyan e.”
