Li navçeya Erdîşê ya Wanê, pîrozbahiya Newrozê li Fener Alayi pêk hat. Girseya gel bi kincên xwe yên reng bi reng serê sibehê li qadê li hev kom bû û dirûşma ‘Bijî Serok Apo’ qîriya. Piştî deqeyeke rêzgirtinê bernameya Newrozê destpê kir û girseya gel li ber muzîkê govend gerand. Piştî axaftina hevserokên navçeyê yên partiyan û hevşaredaran agirê Newrozê hate dadan.
Hevseroka Wanê ya DEM Partiyê Gulşen Kûrt diyar kir ku ew xwedî li banga sedsalê derdikevin û got, “Divê Birêz Ocalan bi rengekî fîzîkî azad bibe.”
Hevserokê Bajêr ê DBP’ê Cemal Demîr jî got, “Peyama Birêz Ocalan peyama aştî, azadî û demokrasiyê ye. Çi dibe bila bibe em ê bi vê banga aştiyê re bin û piştgiriyê bidin.”
Hevşaredara Bajarê Mezin a Wanê Neslîhan Şedal jî got, “Gelê me bi salan li hemberî zextê serî netewand û berxwedana xwe dewam kir. Îro li qadên Newrozê em bûn bi milyonan mirov. Newroz aştî ye, hêvî ye. Agirê Newrozê Jin, Jiyan, Azadî ye. Ji ber ku ev agirê Newrozê di bedena Zekiye û Rahşan de geş bû. Meşaleya aştiyê niha di destê Birêz Ocalan de bilind dibe. Em soz didin Birêz Ocalan; bi pêşengiya jin û ciwanan em ê banga aştiyê bi aştiyeke bi rûmet tacîdar bikin.”
Parlamenterê Wanê Sînan Çîftyurek jî jî diyar kir ku divê dewleta Tirk bi hincetan nekeve nava helwesteke gavneavêtinê.
Parlamentera Wanê ya DEM Partiyê Gulderen Varli jî got, “Piştî êşên ewqasî giran li pêşiya me pêvajoyeke nû ya aştiyê heye. Divê her kes piştgiriyê bide vê.”
AGIRÎ / PANOS
Li navçeya Panos a Agiriyê Newroz li qada Otogar Termînalê bi beşdariya bi sedan kesî hate pîrozkirin. Parlamentera Agiriyê Necla Demîr axivî û got, “Di vê 21’ê Adarê de em ê teqez xwe bigihînin aştî û azadiyê. Em di wê baweriyê de ne ku bi avakirina aştî û azadiyê em ê bi ser bikevin. Sala 2025’an wê bibe sala azadiyê ya gelê Kurd. Li Îmraliyê di 27’ê Sibatê de ji bo gelan peyama aştî û azadiyê hate dayin. Em xwedî li vê peyamê derdikevin û em ê li her qadê bilind bikin.”
Parlamenterê Wanê Mahmût Dîndar jî ragihand ku ji bo bicihanîna bangê wê her tiştên pêwîst bikin.
Piştî axaftinan agirê Newrozê hate dadan. Li qada pîrozbahiyê girseya gel li ber stranan govend gerand.
MÛŞ / GIMGIM
Li navçeya Gimgim a Mûşê girseya gel serê sibehê herikî qada Newrozê. Bi hezaran kes tevlî pîrozbahiyê bûn. Li qadê heta bernameya Newrozê qediya dirûşmên “Bê Serok jiyan nabe” û “Jin, Jiyan, Azadî” hatin qîrîn.
Hevşaredarê Gimgimê yê DEM Partiyê, Parlamentera Mûşê Sumeyye Boz û Parlamenterê Colemêrgê Onûr Duşunmez tevlî pîrozbahiyê bûn.
Parlamenter Sumeyye Boz destnîşan kir ku Newroza 2025’an ji bo aştî û azadiyê xwedî wateyeke dîrokî ye.
Parlamenterê Colemêrgê yê DEM Partiyê Onûr Duşunmez jî diyar kir ku divê gel li dora sekn û helwesta Rêber Apo bicive.
Piştî axaftinan agirê Newrozê hate dadan. Bi sedan kes li ber stranan govend gerandin.
