Şervanê Hêzên Komandos ên QSD’ê şehîd Beşar Xilêf El Seyah ku 29’ê Çileyê li Dêr Hafirê şehîd bûbû, bi merasîmekê li Pakrewangeha Şehîdan a li bajarokê Hikumiyê yê Reqayê hat spartina axê. Bi sedan şêniyên kantona Reqayê, endamên saziyên sivîl û leşkerî, Kombûna Jinan a Zenûbiya, meclis û komînan beşdarî merasîmê bûn.
Di merasîmê de hevserokê Desteya Malbatên Şehîdan û Gaziyên Şer Îbrahîm El Hemûd axivî û got: “Em sersaxiyê ji xwe, ji malbata şehîd Beşar û hevalên wî re dixwazin. Em ji Erdogan û çeteyên wî re dibêjin; hûn gelên me qetil dikin. Em dixwazin hedîsa Mihemed pêxember bînin bîra we ku rijandina xwîna misilmanan, talankirina milkên wan û rûmeta wan heram dike.”
El Hemûd diyar kir ku ew ê heya pêkanîna serkeftinê li ber xwe bidin.
Ji fermandarên Hêzên Komandos ên QSD’ê Mihemed El Hindawî jî diyar kir ku şehîd Beşar bi lehengî şer kir û bi rûmet şehîd bû û wiha domand: “Şehadeta Beşar ji bo me serbilindî ye, wê her tim di rûpelên dîrokî de zindî be. Em soz didin şehîdan ku em ê şopdarên rêya wan; rêya serkeftin û şehadetê bin. Em hêzên xwe yên li eniyên berxwedana li hemberî dewleta Tirk a dagirker û çeteyên wê silav dikin.”
Piştî axaftinan wesîqeya şehîd Beşar hat xwendin û radestî malbata wî hat kirin.
Girseya gel cenazeyê şehîd Beşar bi dirûşmên “Bi can, bi xwîn em bi te re ne şehîd” li Pakrewangeha Şehîdan a li bajarokê Hikumiyê spart axê.
