Siyasetmedarê Şengalî Dexîl Seyîdo û Endama Koordînasyona Tevgera Azadiyê ya Jinên Êzidî (TAJÊ) Neam Bedel têkildarî revandina 5 şervanên YBŞ’ê ji aliyê artêşa Iraqê ve ku 3 ji wan birîndar in, ji ANF’ê re axivîn.
YBŞ DI ENCAMA ŞERT MERCÊN HERÎ ZEHMET DE AVA BÛ
Siyasetmedar Dexîl Seyîdo di destpêka axaftina xwe de got: ‘’Em bi hêvî ne ku Iraq bi vî çavî li wan şervanên ku ev 11 sal in li ber xwe didin, ne nêre û wan bi tu navên cuda bi nav neke. Ew şervan in ku li gel artêşa Iraqê gelek ji heremên Şengalê û derveyî Şengalê jî parastine. Pêwist e Iraq wan rojan li bîra xwe bîne û bizanibe ku YBŞ’ê û YJŞ’ê mîna wan çawa li ber xwe dane û axa Iraqê ji çeteyan rizgar kirine û parastine.’’
Dexîl Seyîdo anî ziman YBŞ di şert û mercên herî dijwar de hatiye avakirin û ev yek anîn ziêam: ‘’Hêzên me yên leşkerî xwe bi xwe ava nebûn. Di demeke wisa de hatin avakirin ku gelê me ber bi tunebûnê ve diçû, Şengal vala bû, hêzên me jî li hember vê zor û zehmetiyê rabûn û heta roja me ya îro bê dûdilî li ber xwe didin û me û axa me diparêzin. Em bi hêvî ne ku dewleta Iraqê tavilê wan şervanên me serbest berde da ku pirsgirêk kûrtir nebê.’’
HÊZA KU ALA IRAQÊ LI ŞENGALÊ RAKIR YBŞ BÛ
Endama Koordinosyona TAJÊ’yê Neam Bedel jî wiha nerînên xwe anîn ziman û got:’’ Yên ku piştî hilweşîna rejêma BAAS’ê ya Sedam ala Iraqê li Şengalê rakirin, hêzên me YBŞ û YJÊ’yê bûn û yên ku li gel artêşa Iraqê li hemberî DAÎŞ’ê şer kirin ev hêz bûn. Îro ev hêz di hedefa artêşa Iraqê de ne û wan weke terorîst bi nav dike û dixwazin tola DAÎŞ’ê ji me hilînin.’’
Neam Bedel piştre anî ziman ku ew weke dayîkên şehîd û şervanan dixwazin ev pirsgirêka heyî bi awayekî aştiyane were çareserkirin û got: ‘’Çend zarokên me di destê wan de ne û hinek ji wan birîndar in jî. Em dixwazin ew zarokên me tavilê werin berdan da ku pirsgirêk kurtir nebê. Em naxwazin di nava me û dewletê de alozî kurtir bibin ji ber ku em jî gelê vê dewletê ne. Ger gel nebê wê demê dewlet jî nabe. Ji ber vê em dixwazin bi hev re mîna ku me li ser axa Iraqê mil bi milê hev DAÎŞ têk bir, em dixwazin car din dewlet wan roja li bîra xwe bîne û bi lîstokên derve nexape. Em dixwazin dewlet li gel YBŞ’ê, axa Iraqê biparêzin û wê ne weke terorê bi nav bike. Yên ku hûn weke terorîst bi nav dikin, zarokên me ne û şeref û rûmeta Iraqê li hemberî dagirkeriyê rizgar kirin û parastin.’’
