7 roj in bênavber ciwanên Kurd destana qehremaniyê li taxa Şêxmeqsûd û Eşrefiyê yên Helebê li dijî êrîşên hovane yên çeteyên hikûmeta demkî yên Şamê û dewleta Tirk dinivîsînin. Li dijî êrîşên hovane û kiryarên dermirovî Xwendekarên Zanîngeha Kobanê daketin qadan û êrîş şermezar kirin.
Xwendekara Fakulteya Mafnasiyê Ahîn Ibrahîm, diyar kir ku ew heta dawî piştgirî didin berxwedana gel û Hêzên Asayîşê yên Şêxmeqsûd û got, “Ev êrîşên dewleta Tirk û çeteyên wê yên hov û kiryarên ku li ser gelê me tên kirin, sûcên şer in û li dijî qanûnê ne. Divê demildest li hemberî van kiryaran serî bê rakirin. Qetilkirina jin û zarokan, hedegirtina nexweşxane û tîmên tendûristiyê di qanûnê de qedexe ye. Dewleta Tirk a dagirker zagona cîhanî binpê dike û hemû kiryarên şer û sûcên dermirovî li ser gelê me pêk tînin. Em berxwedana gelê Kurd a li dijî êrîşan, silav dikim. Em bi dil û can berxwedanê silav dikim. Çawa ku Kobanê bi ser ket, wê Şêxmeqsûd jî bi ser bikeve.”
Xwendekara Beşa Teknîkê ya Zanîngeha Kobanê Diyana Hebeş, jî berxwedana Bendava Tişrînê bibîr xist û got, “Çawa me li Kobanê DAÎŞ’ê têk bir, wê teqez li herdu taxên Kurdan jî berxwedan bi ser bikeve û çete têk biçin. Em her serketî ne. Çawa ku bendava Tişrînê bi ser ket, wê Şêxmeqsûd jî bi ser bikeve.”
