Yek ji fermandarên HPG’ê Yaser Dersîm ê ku bi salan bi Fermandar Şivan Dersîm re maye, ew bi bîr anî û behsa kesayet û teybetmendiyên wî kir.
Yaser Dersîm di destpêka axaftina xwe de bal kişand ser têkoşîna Fermandar Şivan Gever û ev yek anîn ziman: “Ev 20 salên dawî ne ez heval Şivan nas dikim. Dibe ku hin salan em ne li gel hev bûn, lê belê ji sala 2006’an û heya 2011’an em bi hev re bûn. Em weke rêveberî bi hev re bûn. Di gelek mijaran de nîqaş me bi hev re dimeşandin. Hevalê Şivan, hevalê rojên teng bû. Li ku derê valahiyek heba rêxistinê heval Şivan dişand wê derê. Bi rastî jî hevalê Şivan şoreşgerekî demê bû, şoreşgerekî rojên teng bû. Bi hevaltiya xwe, bi pîvanê xwe, bi girêdaniya xwe ev yek dihate xuyakirin. Diyalogên wî yên bi hevalan re tim di çarçovaya rêxistinî de bû ku wê çawa mirovên derdorê xwe perwerde bike, qanih bike, hevalekî di karê xwe de çalak bû. Hevalekî ku ruh dida û timî ji hevalên xwe re alîkar dibû. Di heman demê de her tim dixwest bi hevalan re nîqaş bike û wan perwerde bike. Cihê ku valahî heyî diçû li wir û dixwest li wê derê kombûnekê çêke, lê wê derê jiyanê bide avakirin. Hevalê Şivan wekî şexs tiştekî xwe yê takekesî nebû. Digot ku perçeyek nanê me hebe ev besî me ye. Digot ku felsefeya ku me ji Rêber Apo girtiye, ev e. Baweriyek dabû rêxistinê û rêxistinê jî ev yek didît. Dixwest ew baweriya ku rêxistinê dayê her tim pêk bîne.”
Yaser Dersîm anî ziman ku Fermandar Şivan di şerê li Zagrosê de xwedî kedeke mezin e û got: “Di şerê li Zagrosê de kedeke heval Şivan a mezin hebû. Berê jî kedeke wî ya mezin hebû, bi taybetî jî di şerê tûnelan de. Di nav şer de bû û heta carekê min pirs kir ka çima heval Şivan nayê, hevalan gotin ku dibêje ‘ez nayêm ez ê çawa vê derê dijmin re berdim û werim? Çi dibe bila bibe ew ruhê ku heyî ew berdêlên mezin yên me dane, divê em wan nirxan biparêzên û divê dijmin wisa bi rehetî neyê û xwe bi cih neke. Ger dijmin were jî divê bi mirina xwe were.’ Piştî demekê ji bo civînê hat. Di sala 2022’yan de em bi hev re tevlî civîna Konseya Fermandariya HPG’ê bûn. Li ser pêvajoya heyî gelek nêrînên hevalî hebûn. Rexne û rexnedan hebû. Li ser kêmahiyên heyî nêrînên xwe anîn ziman. Gelek diyalogên me jî bi hev re çêbûn. Demeke dirêj bû ku me hevdu nas dikir. Kîn û nefreta ku li beramberê dijmin tim dida hîskirin. Digot ku me berdêlên mezin dane divê em wisa rehet pes nekin, divê mirovên ku derdorê me ne em pêre eleqeder bibin. Digot ku divê em timî gavên mezin biavêjin. Bi rastî jî gotina hevalê Şivan pratîka wî bû. Digot û pratîka wê pêk dianî û di heman demê de dida kirin. Timî li pêş bû. Mirov dikare bibêje heval Şivan di jiyanê de mamostek bû, pîvan bû.”
Yek ji fermandarên HPG’ê Yaser Dersîm di dawiya axaftina xwe de anî ziman ku Fermandar Şivan Gever gelekî girêdayî çanda Kurdayetiyê bû û ev yek anîn ziman: ‘’Li gel heval Şivan çanda Kurdayetiyê zehf li pêş bû. Min rojekî nedît heval Şivan bi Tirkî axivî. Hin caran hin kes hene ji çanda xwe direvin. Lê hevalê Şivan li pey çanda xwe bû. Giradayî çanda xwe bû. Digot ku zimanê yekê din, çanda yekê din nabe ya min. Divê ez çanda xwe esas bigirim. Bê guman em ne li dijî ziman û çanda tu kesî ne. Lê ya girîng ev e ku mirov çanda xwe esas bigire. Divê mirov destpêkê ya xwe fêr bibe. Ev yek li gel hevalê Şivan wekî rêgezekê bû. Hevalê Şivan di jiyanê de timî di nava hevalan de bû. Hevalên ku pêre mane timî behsa heval Şivan dikirin, behsa pîvan, jiyan, hevaltiya heval Şivan dikirin. Ji hemû aliyan ve heval Şivan mînak bû. Hevalên bi wî rengî di şerê xwe de, di jiyanê de mînak bûn. Ji ber ku bi salane di nava rêxistinê de ne. Kedên mezin, berdêlên mezin dane. Li rastî gelek zor zehmetiyan hatine. Gelek caran belkî bi birçîbûn û tîbûnê rû bi rû mane. Belkî bi rojan di nava dijmin de mane. Hevalê Şivan jî yek ji wan hevalan bû. Ji Erziromê bigire heya Zagrosan keda wî ya bi salan, ruhê wî yê bi salan heye. Bi vê wesîleyê em hevalê Şivan bi bîr tînin û di şexsê heval Şivan de ji bo hemû şehîdan em soza xwe dubare dikin. Em ê şopdarên wan bin.”
