Lijneya Rêveberiya Navendî ya DEM Partiyê têkildarî qetilkirina kedkarên Çapemeniya Azad Nazim Daştan û Cîhan Bîlgîn ên di êrîşa dewleta Tirk a dagirker de şehîd bûn, daxuyanî da.
Daxuyaniya DEM Partiyê bi vî rengî ye:
“Me bi xemgînî bihîst ku rojnamevanên çapemeniya azad Cîhan Bîlgîn û Nazim Daştan vê sibehê ji ber êrîşa SÎHA’yê ya Tirkiyeyê di navbera Bendava Tişrîn û bajarokê Sirrînê de hatine qetilkirin, ajokarê wesayîtê Ezîz Hec Bozan jî birîndar bûye.
Rojnamevanên çapemeniya azad Cîhan Bîlgîn û Nazim Daştan ji 8’ê Kanûna 2024’an ve li Bendava Tişrîn û Pira Qereqozaxê êrîşên Tirkiyeyê û komên çeteyan û berxwedana li dijî van êrîşan dişopand û nûçe belav dikirin. Bi saya xebatên wan ên pîroz raya giştî hînî heqîqetan dibû û geşedanên li Rojava bi awayekî rast dişopand. Wan berxwedana jinên Rojavayî digihandin temamê cîhanê.
Di vê qonaxa dawî de desthilata AKP-MHP’ê dest bi polîtîkayên nû ya qirkirinê kiriye. Hêzên desthilata AKP-MHP’ê niştecihên sivîlan bombebaran dikin û heta niha gelek sivîl ji ber van êrîşan hatin qetilkirin. Em baş dizanin ku ev hedefgirtina rojnamegeran jî êrîşeke rêxistinkirî ye û balafirên Tirkiyeyê bi zanebûn rojnamevan hedef girtine. Ji ber ku rojnamevanên Çapemeniya Azad êrîşên li ser gelê Kurd û gelên Rojava dixistin rojevê û pêşî li nûçeyên derew digirtin, bûn hedefên balafirên Tirkiyeyê. Bi vê hedefgirtinê hat xwestin ku sûcên şer ên li Rojava tên kirin bên veşartin û pêşî li bertekên navneteweyî yên li hemberî polîtîkayên dagirkirinê bê girtin.
Ev êrîş li dijî hiqûqa navneteweyî û mirovahiyê hatiye kirin. Em vê êrîşa qirêj lanet û şermezar dikin. Em bang li rayedarên navneteweyî dikin ku li dijî van êrîşên qirêj demildest dengê xwe bilind bikin û van qetlîaman bisekinînin.
Bila bê zanîn ku ev êrîşên qirêj dê nikaribin têkoşîna gelê Kurd, têkoşîna jinan û têkoşîna rojnamevanên Çapemeniya Azad sist bikin. Têkoşîna Cîhan Bîlgîn û Nazim Daştan dê li erdê nemîne. Çapemeniya azad dê bi biryardarî û têkoşîneke mezin li ser şopa wan li pey heqîqetan be.”
