Tevgera Jinên Azad (TJA) têkildarî 1’ê Gulanê Cejna Karker û Kedkaran daxuyaniyeke nivîskî weşand. TJA’yê di daxuyaniya xwe ya bi sernavê “Jiyana demokratîk dê bi keda jinê were avakirin” de got ku dê 1’ê Gulana îsal bi dirûşma “Israra di sosyalîzmê de, israra di azadbûna keda jinê de ye” pêşwazî bikin.
Bi domdarî wiha hate gotin: “Em vê rojê weke têkoşîna aşkerakirin, parastin û azadkirina keda jinê ya ku di dîrokê de ji nedîtî ve hatiye, pênase dikin. Li kêleka modernîteya kapîtalîst û pergala baviksalarî, keda jinê hem tê tunekirin û hem jî bi awayekî sîstematîk tê paşguhkirin. Jin ne tenê di hêza kar de; di heman demê de ew di karûbarên lênihêrîna malê de, hilberîna çandiniyê, li ser rêyên koçberiyê, li cihên şer û demên krîzê de jî tevahî karê heyî de bar li ser pişta wan e.
Îro li Rojhilata Navîn bi taybetî li Kurdistanê keda jinan ne tenê bi feqîriyê; her wiha bi polîtîkayên şer, koçberkirin, asîmîlasyona çandî û tundiya dewletê tê çewisandin. Bi destê qeyûman êrişên li ser saziyan jinan ked û destkeftiyan dewam dikin. Keda jinê ji ber ku bi vîna siyasî ve girêdayî ye rasterast tê hedefgirtin; hewl tê dayîn ku wan ji jiyana civakî, çandî û siyasî dûr bixin. Weke TJA, em azadiya kedê li ser bingeha azadiya jinê ji nû ve pênase dikin. Keda jinê ne tenê parçeyek ji hilberîna aborî ye; di heman demê de hêza ji nû ve avakirin û veguhertina civakê ye. Lewma têkoşîna me; Têkoşîna azadkirina her cure keda jinan ya li mal, kolanan, li qadan, li dibistanan, li girtîgehan û di rêyên koçberiyê ye.
Di 1’ê Gulanê de banga me ji tevgerên jinên cîhanê re ev e; werin em bi hev re qadên têkoşîna hevpar birêxistin bikin. Em wek jinên Kurd di wê baweriyê de ne ku têkoşîna wekhevî û edaletê ya jinan li ser her erdnîgariyê ji Amerîkaya Latîn bigire heta Efrîqayê, ji Asyayê heta Ewropayê yek e. Li dijî desthilatdariya mêr a ku bi ziman û erdnîgariyên cuda lê bi heman pergalê û ji aliyê heman sîstemê ve tê meşandin, em têdikoşin. Nasname û keda jinan ancax bi xeta azadiyê ya ku sînoran nas nake dikare were parastin. Keda me; ne di çerxa pergala kapîtalîst de, di jiyana demokratîk, ekolojîk û azadiya jinan de dikare wateyekê bi dest bixe.
Di 1’ê Gulana îsal de Bbanga me ji bo rêxistin, sendîka, kolektîf û tevgerên jinan ên cîhanê ev e; werin ji bo ku em keda jinan azad bikin, têkoşîna xwe ya enternasyonal berfireh bikin. Werin em ji tecrubeyên hev xwe pêş bixin, hevgirtinê hertimî bikin, rêxistinbûnê xurt bikin. Keda me rêxistina me ye. Jiyana azad bi keda jinan pêkan e! Jin, jiyan, azadî.”
