Endamê Heyeta Îmraliyê û Serokwekîlê Meclîsê yê ji DEM Partiyê Sirri Sureyya Onder ku ji ber nexweşiya dil li Nexweşxaneya Florence Nightingale li beşa çavdêriya awarte piştî dermankirina 18 rojan di 3’ê Gulanê de jiyana xwe ji dest da, welat xemgîn kir. Onder ku bi gotina xwe ‘kedkarekî aştiyê’ bû, bi kesayetiya xwe, bi hunera xwe û taybetmendiya xwe ya ku mirov digihand hev, ji aliyê derdorên cuda ve hate hezkirin. Li gel rewşa wî ya giran a tenduristiyê jî kes ne li benda vê mirina zû bû. Her kes bi hêvî bû ku Onder rabe ser xwe û jiyana xwe dewam bike.
Yek ji wan kesan ku ti carî bê hêvî nebû, hevalê Sirri Sureyya Onder, derhêner û lîstikvan Ganî Ruzgar Şavata bû. Şavata ku 18 rojan çû nexweşxaneyê, bi saetan li wir kete nobedê, ev xatirxwestina zû pêk hat, lê giran hat. Şavata got, ‘Hînê me yê fîlmê min bikişanda’ û ji ANF’ê re axivî. Şavata diyar kir ku 35 sal in ew Sirri Sureyya Onder nas dike û got, “Ez ji Meletiyê me, ew jî ji Semsûrê. Me sînema hînî wî kir, wî jî siyaset hînî me kir. Lê belê mejî, fikir û pênûsa wî li pêşiya me hemûyan bû. Ew pêşeng bû, aştîxwaz bû, bi edalet bû.”
Şavata Onder şiband Kawayê Hesinkar û diyar kir ku meşaleya aştiyê bi wî geş bû. Şavata ragihand ku daxwaza Onder timî aştiyeke bi rûmet bû, di vê rêyê de jî gel gihand hev û got, “Me xweziya xwe pê dianî, em heyrane wî bûn. Keça wî Ceren hewl da bi hemû gotinan qala wî bike. Keça me Ceren sernav danî. Niha wezîfeya me ya ku em hemûyan dagirin. Ew meşaleya agirê Newrozê bû. Wêrekiya Kawayê Hesinkar bû. Bi qasî samûrayekî şervan bû. Lê belê şervanê aştiyê bû. Digot, ‘Em ji mirinê betilîn, lê belê hinek ji kuştinê nebetilîn’.”
‘YEKANE DAXWAZA SIRRI SUREYYA ONDER DÎTINA AŞTIYÊ BÛ’
Şavata diyar kir ku bi Sirri Sureyya re 35 salan wan gelek bîranîn dan hev û got, “Timî henek dikir. Ez du salan ji wî mezintir im. Mînak timî ji min re digot, ‘Şavata ez ê rojekê fîlmê te bikişînim. Bi şertekî, herî kêm 100 salî bijî’. Min jî jê re digot, wê demê tu yê jî 120 salan bijî. Wî jî digot, bêguman, pêwîstiya vî welatî bi aştiyê heye, pêwîstiya me hemûyan pê heye.”
Şavata gotina ‘Pêwîstiya vî welatî ji min bêhtir bi te heye. Tu rabe ez bêm’ li lênûska bîranînê nivîsî ya li nexweşxaneyê ji bo Onder hate danîn û got, “Xatirxwestineke pir zû bû. Nikarim qebûl bikim. Bi wezîfeyên gelekî mezin rabû, ji bo aştiyê hewl da. Wezîfeya anîna aştiyê êdî li ser milê me hemûyan e. Ev wezîfe bi taybetî li ser milê gelan, ciwanan e.”
Şavata diyar kir ku aştî û hêvî wê bi ciwanan re bê û got, “Yekane daxwaza Sirri Sureyya Onder dîtina aştiyê bû û em ê vê daxwaza wî bi hev re bi cih bînin.”
Şavata ragihand ku Sirri Sureyya Onder dixwest têkildarî meclîsê fîlmekî bikişîne, ew ê vê daxwaza wî bi ich bîne û got, “Ti xewn û xeyalên wî, wê nîvco nemînin. Ez ê ji bo bîranîna wî fîlmekî li ser Sirri Sureyya Onder bikişînim. Ji ber ku têkoşîna wî cuda bû. Em ê xwedî li bîranîna wî derkevin, bê rawestan em ê bimeşin. Em ê hêviya wî ya aştiyê bigihînin her derê.”
