Li gorî lêkolînê, ji sedî 14 zêdetir ciwanên temenê wan di navbera 10-19 salî de ne pirsgirêkên derûnî dijîn, rêjeya xwekuştinê ya ciwanên temenê wan di navbera 15-19 salî de ji 100,000 kesan 6 kes hatiye tomarkirin.
Serokê KidsRightsê Marc Dullaert ev tişt anî ziman: “Em bi xetereyê re rû bi rû ne û em êdî nikarin vê yekê paşguh bikin.”
Di raporê de hat destnîşankirin ku belavbûna bêkontrol a medyaya dîjîtal rasterast rê li ber depresyon, fikar û tiryakêşiya zarokan vedike.
Li gorî KidsRightsê bi taybetî li Ewropayê, bikaranîna medyaya dîjîtal gihîştiye asta krîtîk. Her çiqasî ji sedî 13 zarokên 13 salî medyaya dîjîtal “bi pirsgirêk” bikar tînin jî, ji sedî 39 zarokên 15 salî hema hema timî li ser online bi hevalên xwe re di têkiliyê de ne. Ev girêdayîbûna dîjîtal rasterast bandorê li ser jiyana rojane ya zarokan dike.
Di raporê de hat daxuyand ku nebûna daneyan li ser derûniya ruhî hîn jî pirsgirêkek mezin e û hikûmet ji bo kontrolkirina vê gefa dîjîtal zehmetiyan dikşînin. Dullaert anî ziman ku divê aramiya zarokan li pêşiya qezencên şîrketan be.
Hefteya borî di civîna wezîran a li Luksemburgê de Yewnanistan bi piştgiriya Fransa û Spanyayê, pêşniyar kir ku divê platformên dîjîtal ên ji hêla zarokan ve tên bikaranîn, hişktir bên kontrolkirin.
Dullaert bang li hikûmetan kir ku divê tedbîrên lezgîn û bibandortir bigirin û got, “Ne tenê hêrsbûn, divê gavên şênber bên avêtin.”
