Ji 13’ê Tîrmehê ve li bajarê Siwêdayê yê li başûrê Sûriyeyê, ku piraniya wê nifûsa Durzî ye, bi taybetî hêzên ewlekariyê yên girêdayî Wezareta Karên Hundir a Sûriyeyê û gelek rêxistinên çekdar êrîşî bajêr kirin. Li hemberî van êrîşan, gelê Durzî çek hildan û bersiv da, di encama şer û pevçûnan de bi Hêzên Ewlekariya Hundir re, komên çete paşde vekişandiyan.
Piştî vê DAÎŞ, HTŞ, SMO û rêxistinên din ên cîhadîst ên radîkal, bi navê eşîrên Ereb û Bedevî, bi rengekî organîze dest bi armanckirina gelê Durzî kirin. Bi fermana Colanî li welat seferberî hate ragihandin û banga “cihadê” li komên radîkal hate kirin. Li ser vê bangê, komên çekdar ên selefî ji deverên cuda yên Sûriyeyê berê xwe dan Siwêdayê û tevlî êrîşan bûn.
BI SEDAN JIN HATIN REVANDIN
Di endama van êrîşan de bi sedan welatiyên sivîl ên Durzî jiyana xwe ji dest dan û ji 100 zêdetir jinên Durzî hatin revandin. Hate zanîn ku gelek cih hatin wêrankirin û şewitandin.
NEXWEŞXANE KIRIN ARMANC
Li gel êrîş, revandin û şewitandinê jî, yek ji armancên rasterast ên êrîşan Nexweşxaneya Vatan a li navenda bajarê Siwêdayê bû. Ev nexweşxane li navenda tenduristiyê ya herî mezin a bajêr e. Ev nexweşxane xizmetê dide hezaran welatiyan. Tê gotin ku bi sedan nexweş û birîndar di hundirê vê nexweşxaneyê de hebû.
ANF’Ê XWE GIHAND DÎMENAN
ANF’ê xwe gihand dîmenên li Nexweşxaneya Vatan a Siwêdayê ku bi sedan kes tê de bûn û çeteyan lê komkujî kir. Çeteyan di navbera 16 û 18’ê Tîrmehê de nexweşxane nêzî 4-5 saetan di bin dorpêçeke giran de hiştin. Piştî ku nexweşxane dorpêç kirin, derdora wê bi tankan dorpêç kirin. Di heman demê de ketin hundirê nexweşxaneyê û bijîşk, hemşîre, birîndar û hemû kesên li wir hebûn qetil kirin.
Piştî demeke kurt, di hundir û derdora nexweşxaneyê de di navbera çeteyan û gel de şer rûda. Di şer de hin çete di hundirê nexweşxaneyê de hatin kuştin. Hîna agahiyên zelal der barê hejmara kesên ku ji aliyê çeteyan ve hatine qetilkirin, winda û birîndaran de nehatine bidestxistin. Tê ragihandin ku rewşa nexweşxaneyê pir giran e û hêj cenaze di hundirê wê de hene.
Di şert û mercên heyî de rakirin û veşartina cenazeyan ne gengaz e. Hate zanîn ku Heyva Sor a Sûriyeyê alîkarî gihandiye herêmê, lê mîqdara alîkariyê pir sînordar e û ji bo rakirina cenazeyan têrê nake. Tê gotin ku cenaze li ser hev hatine komkirin, lê agahiyên zelal der barê hejmara wan de tine ye. Piranî bijîşkên li nexweşxaneyê ji aliyê çeteyan ve hatine qetilkirin. Hat ragihandin ku 3 bijîşkên ku hewl didan xwe bigihînin nexweşxaneyê ji aliyê çeteyan ve bi awayê sûîqestê hatin kuştin.
Di dîmenên ku gihîştine destê me de, tê dîtin ku hêj bi dehan cenaze di hundirê nexweşxaneyê de hene.
