Li Şengalê ji aliyê Meclîsa Xweseriya Demokratîk a Şengalê û Saziya Malbatên Şehîdan ve merasîmek ji bo bîranîna şehîdên mehên Hezîran û Tîrmehê hate lidarxistin.
Bîranîn, li Goristana Şehîd Dilgeş û Şehîd Berxwedan a li ser Çiyayê Şengalê pêk hat.
Di bîranînê de şervanên ku di dîrokên cûda de şehîd ketibûn, her wiha Şehîd Bahoz Zerdeşt jî hate bibîranîn ku nasnameya wî nû hatibû eşkerekirin. Bahoz Zerdeşt di 8’ê Adara 2024’an de, di êrişa dewleta Tirk a li Herêmên Parastinê yên Medyayê de şehîd bûbû. Ew bi taybetî ji bo keda xwe ya mezin a di dema fermanê û êrişa çeteyên DAÎŞ’ê ya li ser Şengalê de hate bibîranîn.
Merasîm bi tevlîbûna endamên sazî û rêxistinên civaka Êzidî û Ereb, tevî rûspî û kesayetiyên civakê, bi deqeyek rêzgirtinê ji bo bîranîna giyanê hemû şehîdan destpê kir. Piştî deqeya rêzgirtinê, ji aliyê dayikên şehîdan ve mûm hatin pêxistin û piştre axaftin hatin kirin.
Axîn Întîqam li ser navê Fermandariya YBŞ û YJŞ’ê axivî û di şexsê Şehîd Bahoz de hemû şehîd bi bîr anîn û got: “Yên ku xwîna xwe di axa Şengalê de rijandin, ji bo me sembola berxwedan û fedakariyê ne. Wan ne tenê Şengal rizgar kirin, lê di heman demê de ruhê berxwedanê di nava civaka Êzidî de jî geş kirin. Bi saya wan, îro Êzidî dikarin li ser axa xwe bi azadî bijîn û nasnameya xwe biparêzin. Bîranîna wan, ji bo me bîranîna êş û azarên mezin e lê di heman demê de bîranîna hêz û berxwedana me jî ye.”
Axîn Întîqam anî ziman ku xwedî derketina li bîranîna şehîdan, tê wateya xwedî derketina li nirxên ku wan canê xwe ji bo wan feda kirin û wiha berdewam kir: ‘’Ev tê wateya ku em piştgirî bidin malbatên şehîdan û her dem li kêleka wan bin. Em ê ti carî şehîdên xwe ji bîr nekin. Ew ê her dem di dil û mejiyê me de bijîn. Soza me ji wan re ew e ku em ê ala azadiyê, ya ku wan bi xwîna xwe bilind kir, ti carî nehêlin bikeve.”
Li ser navê Meclîsa Xweseriya Demokratîk a Şengalê, Nayîf Şemo jî axivî û diyar kir ku bi keda şehîdan, wan xwe ji fermanê rizgar kiriye û niha derbasî merhaleyek nû bûne. Her wiha anî ziman ku peyama Rêber Apo ya ji bo civaka Êzidî bû destpêka ronesansa Êzidiyan û got: “Em jî dibêjin, azadiya Rêber Apo wê bi temamî civaka me û gelê Kurd ji ferman û talanê biparêze.’’
Merasîm piştî axaftinan bi pêşandana sînevîzyonek li ser jiyana şehîdan û bi dirûşmeyên “Şehîd Namirin” bi dawî bû.
