Koma gerîla ya ji 30 kesî ku xwe weke ‘Koma Aştî û Civaka Demokratîk’ pênase kir, piştî banga bi dîmen a Rêber Apo bi merasîmeke bi beşdariya bi sedan kesî çekên xwe şewitandibû.
Bi milyonan kesî li ber televîzyonê li vê merasîma dîrokî temaşe kirin. Gerîlayên ku çekên xwe şewitandin, bangên xwe yên ji bo aştiyê nû kirin. Hin malbatan jî piştî bi salan yekemcar zarokên xwe li ber televîzyonê dîtin.
Yek ji gerîlayên ku beşdarî merasîma 11’ê Tîrmehê bû Etem Kiliç (Serdar Bawer) bû. Malbata Kiliç piştî 11 salan zarokê xwe di televîzyonê de dît.
Endamên malbatê ku hem bi kelecan hem jî bi kêfxweşiyeke şikestî ne, anîn ziman ku ev derfet gelekî mezin e û ew piştgiriyê didin pêvajoyê.
Bav Adil Kiliç li ser pêvajoyê got, “Gelek cenaze hatin. Ji bo hîn bêhtir xwîn nerije, em di her şert û mercî de piştgiriyê didin vê gavê.”
‘BILA CENAZE NEÇE MALA KESÎ’
Adil Kiliç piştî ku li dîmen temaşe kir, hestên xwe bi van gotinan anî ziman: “Piştî bi salan min kurê xwe dît. Ji roja ku çû û pê ve ne me ew dît ne jî dengê wî bihîst. Wê rojê di danîna çekan de me li televîzyonê dît. Li malê me dubare li dîmen temaşe kir. Weke malbat em weke gelê Kurd dixwazin mîna hemû gelên Rojhilata Navîn di nava aştiyê de bijîn. Ji vê pêvajoyê û vê gava dîrokî em hem serbilind in hem jî kêfxweş in. Bila canê kesî neşewite, em naxwazin cenaze biçe ti malekê. Em aştiyeke bi rûmet û samîmî dixwazin. Em weke hemû gelan wekheviyê dixwazin.”
Kiliç ragihand ku li gel zor û zehmetiyên bihurî ew ti carî nebûn alîgirê şer û got, “Me ewqas zor û zehmetî dît, lê belê ti carî em nebûn alîgirê şer û xwînê. Ev aştî wê bi kêrî gelan bê. Dema ku min ew dît gelekî kêfxweş bûm û serbilind bûm. Derfeteke bi vî rengî bi destê kesî nakeve.”
‘DIVÊ EM VÊ KÊFXWEŞIYA ŞIKESTÎ BI AŞTIYÊ BI ENCAM BIKIN’
Kiliç diyar kir ku ew bawer dike, pêvajoya aştiyê ji bo her kesî encamên erênî bi xwe re bîne û got, “Bi hezaran ewladên vî gelî di vê demê de jiyana xwe ji dest dan. Ji ber vê yekê kêfxweşiya me şikestî ye, lê belê bi aştiyekê re wê gel bi temamî kêfxweş bibe. Her kes vê pêvajoyê dixwaze, lê belê weke gel divê dewlet jî gavê biavêje. Bi hezaran mirov girtî ne, bi hezaran hevalên me ji ber ku siyaset kirine li sirgûnê ne. Ev mirov bê sûc têne cezakirin.”
‘HEM KÊFXWEŞ BÛM HEM JÎ XEMGÎN BÛM’
Dayik Vesîle Kiliç jî got, “Me nizanîbû ku wê di televîzyonê de xuya bike. Dema ku min ew dît hem gelekî kêfxweş bûm hem jî gelekî kelecanî bûm. Em dayik û malbat heta dawiyê piştgiriyê didin vê pêvajoyê. Bila aştî pêk were û em zarokên xwe bibînin. Min 11 salan qet kurê xwe nedît.”
