Li gorî malpera Dengê Binçavkiriyên Kurd û Îranê, li girtîgeha Qizilhesar ya li bajarê Kerac ya Îranê, 9 girtiyên siyasî 8 rojin ketine greva birçîbûnê.
Hate gotin ku girtî li hemberî rewşa ne mirovî, êşkence û darvekirina du girtiyên siyasî ên bi navê Bêhruz Îxsanî û Mehdî Hesenî ketine greva birçîbûnê.
Li gorî hema çavkaniyê girtiyên ketine greva birçîbûnê, hefteyeke di hûcreyên takekesî de tên ragirtin û her ku diçe rewşa wan ya tenduristiyê xirab dibe.
Navê girtiyên di greva birçîbûnê de evin:
Loqman Emîn Pur, Sipêhr Îmam Cume, Muysem Dihêban Zade, Hemze Siwarî, Mustefa Remezanî, Selahedîn Ziyabî, Erşam Rezayî, Ehmed Reza û Reza Selamn Zade.
Hêjayî gotinê ye di 27’ê Tîrmeha îsal de, bi fermana berpirsê girtîgeha Qizilhesar ya bajarê Kerecê, 100 pasewanên çekdar yên girtîhê û hêzên îstîxbaratê avêtibûn ser odeyên girtiyên siyasî û gelek girtiyan avêtibûn hûcreyên yek kesî.
LI SINEYÊ MAMOSTEYEK JIN CAR DIN HATE BINÇAVKIRIN
Li gorî agahiyên hatine belavkirin, duh mamosta û çalakvana civaka sivîl Suheyla Xalîdiyan (58) ji aliyê hêzên ewlekariyê yên Îranê ve hate binçavkirin.
Hate diyarkirin ku hêzên Îranê bi ser mala çalakvana sivîl Suheyla Xalîdiyan ya li bajarê Sine ya Rojhilatê Kurdistanê de digirin û wê binçav dikin û berbi cihek nediyar ve tê birin.
Suheyla Xalîdiyan di dema xwepêşandanên Şoreşa ‘Jin, Jiyan, Azadî’ ya piştî qetilkirina Jîna Emînî ya ji aliyê hêzên Îranê ve destpê kir de, ji aliyê hêzên Wezareta Îtlaatê ya Îranê ve hatibû binçavkirin û piştre hatibû berdan.
Hêjayî gotinê ye ku li gorî Rêxistina Mafê Mirovan a Kurdistan û Îranê ragihandî, di nava 11 mehên sala 2024’an de 120 çalakvanên jin hatine binçavkirin, 232 jin jî hatine girtin. Her wiha 41 jin jî hatine darvekirin.
