Bangladeş û Pakîstan ku piştî di sala 1971’an de veqetiyan bûn dijminên hev, li hev kirin têkiliyên xwe yên rageşe yên salên dirêj, bi taybet têkiliyên xwe yên bazirganiyê xurt bikin.
Wezîrê Karên Derve yê Pakîstanê Îshaq Dar ji sala 2012’an vir ve rayedarê asta herî bilind ê Pakîstanê ye ku serdana Dakkayê kir. Dar diyar kir ku ji bo berjewendiya gelên her du welatan “derfetên mezin” hene.
Lê Bangladeş ji ber komkujiyên di dema şerê serxwebûnê de hatin kirin, hîna jî li bende ye ku Pakîstan lêborîneke fermî bixwaze.
Artêşa Pakîstanê di sala 1971’an de bi binpêkirinên mafên mirovan ên berfireh hatibû sûcdarkirin; di şer de bi hezaran kes, li gorî Bangladeşê jî bi milyonan kes jiyana xwe ji dest dan. Dakka diyar kir ku ev mijar hîna nehatiye çareserkirin.
Şêwirmendê Karên Derve yên Bangladeşê Muhammed Tuhid Huseyîn got ku di mijara xwestina lêborînê de pêşketin çênebûye, lê diyar kir ku divê ev yek li ber têkiliyan nebe asteng. Her du alî ji bo xurtkirina hevkariya aborî û zêdekirina danûstendina çandî peymanên cuda îmze kirin.
Şirovekar diyar dikin ku Hindîstan ku cîran e wê van geşedanan ji nêz ve bişopîne. Bangladeş piştî şerê serxwebûnê nêzî Hindistanê bibû. Lê di Tebaxa 2024’an de piştî ku Şex Hasîna di encama serhildana gel de ji erk hate dûrxistin û li Hindistanê stirî, têkiliyên di navbera her du welatan de sist bûn.
