Vergès, di nameya xwe ya ji Partiya Wekhevî û Demokrasiyê ya Gelan (Partiya DEM) re şandî de, bîr xist ku di 27ê Sibata 2025an de Rêber Apo bangewaziyeke dîrokî kiribû ji bo fesihkirina PKK’ê û bidawîkirina têkoşîna çekdarî.
Di nameyê de ev tişt hatin gotin: “Di 27ê Sibata 2025an de, damezrînerê Partiya Karkerên Kurdistanê (PKK) Abdullah Ocalan, bangewaziyeke dîrokî kir ji bo fesihkirina rêxistinê û bidawîkirina têkoşîna çekdarî. Ev bang, piştî ku Serokê Giştî yê Partiya Tevgera Netewperest (MHP) Devlet Bahçelî dest da parlamenterên Kurd û li ber raya giştî bang li Rêberê Gelê Kurd Abdullah Ocalan kir ku PKK bê fesîhkirin, hat. Van gavên, destpêka proseya aştiyê ya nû ku hêvî û bendewariyê diafirîne nîşan dan.”
Vergès, bi bîr xist ku di Kongreya 12emîn a PKK’ê ya di meha Gulanê de hat lidarxistin de ev bang bi yekdengî hat qebûlkirin, di 11’ê Tîrmehê de li Silêmaniyê merasîmeke sembolîk a şewitandina çekan hat kirin û ji bo damezrandina bingeheke qanûnî ya aştiyê komîsyoneke parlamentoyê hat avakirin û van nirxandinan kir: “Aşitî divê bê dudilî bê piştgirîkirin. Aşitiyeke mayînde û adil; ne tenê navberek di navbera du şeran de, lê divê aşitiyeke ku aramiya civakî misoger dike û daxwaza gelan a edalet û wekheviyê pêk tîne be. Li dijî rewşa şerê domdar û planên emperyalîst ên hêzên cîhanî an herêmî, alternatîfa yekane ya rastîn aşitî ye.”
Di nameyê de wiha hate domandin: “Hêzên pêşverû û demokratîk ên cîhanê, divê di asta neteweyî, herêmî û navneteweyî de piştgirî bidin vê hevbendiya dîrokî ya Kurd-Tirk. Ji ber ku rewşa heyî vê yekîtiyê kiriye mecbûriyeteke dîrokî. Wekî ku Abdullah Ocalan gotiye: ‘Em ne bawerî bi şîdet û pevçûnan, lê bawerî bi hêza siyaseta demokratîk û aşitiya civakî dikin.’ Îro, di serdemeke ku şîdet û qirkirin zêde dibe, proseya aştiyê ya li Tirkiyeyê ne tenê pêwîst e, lê di heman demê de lezgîn e jî.”
VERGÈS KÊ YE?
Françoise Vergès, yek ji pêşengên femînîzma antî-kolonyalîst li Fransayê ye; nivîskara pirtûkên A Decolonial Feminism, A Feminist History of Violence û A Programme of Absolute Disorder e. Her wiha li Navenda Lêkolînên Nîjadperestî û Nîjadperestkirinê ya Sarah Parker Remond a li University College Londonê wekî lêkolînereke payebilind xebatên xwe didomîne.
