Li paytexta Kolombiya Bogota di pêşengiya tevgera jinan de li ser pêvajoya civaka demokratîk û aşitiyê panelek hate lidarxistin. Panel li Casa de la Paz hate çêkirin û bi beşdariya gelek kesan nîqaşên berfireh hatin kirin.
Panel bi pêşengiya rêxistinên civakî yên Juntaza Anticolonial, Puños Libertarios u Feministas Antifascistas hate organîzekirin. Di panelê de li ser dîroka Kurdistanê û PKK’ê, pêvajoya civaka demokratîk û aşitiyê, girîngiya tevgera azadiya jinê, rewşa Rojhilata Navîn û şerê cîhanê ya sêyemîn û rewşa Rêber Apo nîqaş hatin kirin.
Di panelê de nûnera Tevgera Jinên Kurdistan ên Abya Yala axivî û balkişand ser rewşa Rêber Apo û pêvajoya aşitî û civaka demokratîk. Nûnera Tevgera Jinên Kurdistan ên Abya Yala got, “Pêvajoya civaka demokratîk û aşitiyê û aramiya tevahî Rojhilata Navîn bi azadiya fîzîkî ya Rêber Apo ve girêdayî ye. Lewma niha gelê Kurd û dostê wan hemû ji bo azadiya fîzîkî ya Rêber Apo têdikoşin. Taybet ji bo mafê hêviyê ji Rêber Apo re were nasîn, hewldanek bêhampe heye. Bêguman niha li Kurdistanê şoreşa civaka demokratîk tê avakirin. Lê belê ev şoreş xwedî xisleteke enternasyonel e. Lewre armanca Rêber Apo konfederalîzma demokratîk a cîhanê ye. Ji bo em bigihîjin vê armancê divê di navbera gelan û jinan de yekîtiya şoreşgerî û enternasyonalî hebe.”
Di dawiya panelê de beşdaran ji bo azadiya fîzîkî ya Rêber Apo peyamek şandin û bangawazî kirin. Peyam û bangawaziya beşdaran bi vî rengî ye: “Em ji Kolombiya daxwaz dikin ku ‘mafê hêviyê’ were pêkanîn. Ji gelan re azadî! Ji Ocalan re azadî!”
Panel bi temaşekirina sînevîzyonên li ser Berxwedana Jinên Ciwan ên bendava Tişrînê û Parastina Jinan a ku Kongra Star amadekiriye, bi dawî bû.
