Cezayê hucreyê yê 11 rojan li girtiyê nexweşê giran Civan Boltan ê li Girtîgeha Girtî ya Tîpa F a Bolûyê tê ragirtin hatî birîn, hate erêkirin. Destê rastê yê Boltan nîne, çavekê wî nabîne û di çavê wî yên din de jî rêjeya dîtinê ji sedî 20 e. Di lêgerîna qawîşê de ji ber pirtûkên hatine desteserkirin bi îdîaya “propagandaya rêxistinê kiriye” cezayê hucreyê dan Boltan.
Piştî cezayê ku ji ber notên hatine girtin hate dayîn, pêvajoya darazê destpê kir. Dozgerê Komara Boluyê pêvajoya darazê kir “meseleya welêt”. Li dijî cezayê hucreyê parêzeran îtîraz kir, ewilî hate qebûlkirin û ceza hate betalkirin. Lê belê li ser îtîraza dozgeriyê dosya car din hate lêkolînkirin û dadgeha cezayê giran îtîraza dozgeriyê qebûl kir û cezayê hucreyê yê 11 rojan car din erê kir.
JI BER PIRTÛK Û NOTAN JI BO 11 ROJAN CEZAYÊ HUCREYÊ HATE DAYÎN
Meha Hezîrana borî di lêgerîna qawîşê ya hatî kirin de, pirtûk, not û nivîsên Civan Boltan hatin desteserkirin. Dadgerê înfazê naveroka nivîsên hatine desteserkirin nirxand û ewilî pêvajoya disiplînê da destpêkirin. Piştre ji bo 11 rojan cezayê hucreyê li Civan Boltan ê ku jiyana xwe bi rengekî pir zehmet diborîne, hate birîn. Parêzerê dosyayê Mehdî Ozdemîr diyar kir ku cezayê hatî birîn nehiqûqî ye û ji sûc dûr e. Ozdemîr bi daxwaza rakirina biryarê gilîname da Dadgeriya Înfazê ya Boluyê.
Dadgeriyê piştre biryar da ku giliyê qebûl bike û cezayê disiplînê jî rakir.
4 rojan piştî biryara di 7’ê Tîrmehê de hatî dayîn, Dozgerê Komara Boluyê îtîrazê biryara dadgeriya înfazê kir. Dadgeha Cezayê Giran a 1’emîn a Boluyê jî îtîraza hatî kirin nirxand û biryareke berevajiyê dadgeriya înfazê da û xwest ku biryara beriya vê were betalkirin. Dadgehê îtîraza dozger qebûl kir û bi hinceta ceza “li gorî ûsul û qanûnê ye” ji bo 11 rojan cezayê hucreyê da.
Dadgehê raporên tenduristiyê û rewşa astengdar a Civan Boltan jî ji nedîtî ve hat. Parêzer Mehdî Ozdemîr diyar kir ku ev yek nayê qebûlkirin û got, ew ê car din îtîrazê vê biryara ku bi nakokiyan tejî, bikin.
‘KESEKÎ KU DESTEKÊ WÎ NÎNE, NIKARE LI HUCREYÊ BI TENA SERÊ XWE BIJÎ’
Dayik Nazime Boltan jî nerazîbûn nîşanî rewşê da û got, divê biryara hatî girtin demildest were rakirin. Nazime Boltan diyar kir ku kurê wî yê girtî nexweş e û tevî biryara DMME’yê nayê berdan. Nazime Boltan got, “Di nava êşkenceyê de êşkence dikin. Cezayê ku ji ber pirtûk yan jî notan hatî dayîn, nayê qebûlkirin. Dadgeh jî vê tîne ziman. Hevalên wî li qawîşê alîkariyê didin kurê min; li hucreyê jî ti kes nîne ku alîkariyê bide wî.”
