Tevgera Jinên Azad (TJA), bi dirûşma “Bi hêvî ber bi azadiyê dimeşin” di 1’ê Cotmehê de ji Amedê ber bi Enqereyê ve meşekî dide destpêkirin. Meş wê ji Amedê dest pê bike û di 7’ê Cotmehê de li ber Girtîgeha Jinan a Sincanê ya Enqereyê bi daxuyaniyeke çapemeniyê bi dawî bibe. Tê payin ku nêzî 250 jin beşdarî meşê bibin û meş wê li gelek navendan pêk were. Ji bilî aktîvîstên TJA’yê, Dayikên Aştiyê û nûnerên saziyên sivîl ên jinan jî wê beşdarî meşê bibin. Jin wê di meşê de banga aştî û civaka demokratîk bikin. Jin wê ji bo mafê hêviyê, siyaseta demokratîk, bidawîkirina qetilkirina jinan, rakirina qeyûman û avêtina gavên berbiçav bi otobusan dest bi rêwîtiyê bikin.
‘MAFÊ HÊVIYÊ DIVÊ BIKEVE MERIYETÊ’
Yek ji kesên ku wê di meşê de cih bigire, Hevşaredara Dersimê Bîrsen Orhan e, ku qeyûm tayînî şûna wê kiribûn. Orhan agahiyên meşa ku wê di 1’ê Cotmehê de ji Amed, Curnê Reş, Dîlok, Edene û Mêrsînê dest pê bike û di 7’ê Cotmehê de li Enqereyê bi dawî bibe, vegot. Bîrsen Orhan armancên bingehîn ên meşê anî ziman û got: “Daxwaza me ya yekem, sepandina mafê hêviyê ye. Mafê hêviyê yê ku wê li ser Birêz Abdullah Ocalan bê sepandin, ne tenê azadiyeke takekesî ye; di heman demê de ji bo azadiya gelê Kurd û çareseriya demokratîk jî gaveke diyarker e. Ji ber vê yekê, em jin ji bo mezinkirina hêviya aştiyê û pêşxistina vê pêvajoyê dimeşin.”
‘BALA XWE BIDIN XIZANIYA JINAN’
Bîrsen Orhan bal kişand ser bandora şer û xizaniya li ser jinan û wiha berdewam kir: “Em jin in ku koçberî, xizanî û jiyana di bin sîwana şer de bi awayekî kûr hîs dikin. Em dizanin ku banga aştî û civaka demokratîk a di 27’ê Sibatê de hatî kirin ji bo jinan çiqasî watedar e. Êdî bidawîbûna şer û xizaniyê, xurtbûna hêviya aştiyê pir biqîmet e.”
‘DIVÊ GAVÊN BERBIÇAV WERIN AVÊTIN’
Bîrsen Orhan anî ziman ku divê komîsyona di bin banê TBMM’ê de hatiye avakirin êdî gavên berbiçav bavêje. Bîrsen Orhan daxwaz kir ku bi Rêber Apo re hevdîtin bê kirin, şaredariyên ku bi qeyûman hatine desteserkirin dîsa radestî vîna gel û hevşaredar dîsa dest bi kar bikin. Bîrsen Orhn destnîşan kir ku divê zimanê dayikê û mafên çandî bên parastin û hemû maf li ser bingeheke zagonî bên misogerkirin. Bîrsen Orhan diyar kir ku jin ji bo bilindkirina daxwaza aştiyê û azadiyê ev meş dane destpêkirin û wê bi biryardarî bidomînin.
Bîrsen Orhan wiha domand: “Em jin, ne tenê ji bo mafên xwe, lê ji bo azadiya gelên me, aştiyê û demokrasiyê jî dimeşin.” Orhan bal kişand ser girîngiya meşê ji bo xuyabûna deng û daxwazên jinan.
‘MEŞA ME JI BO DAD Û AŞTIYÊ YE’
Aktîvîsta TJA’yê Zemzem Feda jî diyar kir ku jinên Kurd, têkoşîna xwe ya li dijî polîtîkayên asîmîlasyonê û desteserkirina vînê bi vê meşê ber bi Enqereyê ve dibin û got: “Bi vê meşê em ê hem azadiyê hem jî dadweriyê bi dengekî bilind daxwaz bikin.”
Zemzem Fedaî wiha berdewam kir: “Ji bo azadiya Birêz Abdullah Ocalan ku ji gelê Kurd re bûye ronahiya hêviyê, em jin dimeşin. Komîsyon hat avakirin, em dixwazin ku ev lijne divê zûtirîn demê bi Ocalan re hevdîtinê bike. Divê dev ji hişmendiya serdestiya mêran û polîtîkayên mîlîtarîst bê berdan. Divê di nav gel de hawirdoreke baweriyê bê afirandin. Ev yek jî armancên me yên sereke ne.”
Aktîvîsta TJA’yê Zemzem Fedaî bal kişand ser wê yekê ku azadbûna jinan wê rê li ber azadbûna gelan jî veke û got: “Em mîratdarên têkoşîna azadiyê ya bi salan in. Jin wê azad bibin, gel wê azad bibin. Birêz Ocalan wê azad bibe. Em vê meşê ji bo dad, aştiyê û demokrasiyê pêk tînin.”
