Bîst û heft sal di ser komploya navneteweyî ya li dijî Rêber Apo re derbas bûn, ku ji aliyê hêzên navneteweyî ve hatibû organîzekirin. Ev komploya ku 26 dewlet tê de cih girtin, wekî yek ji komploya siyasî yên herî berfireh di dîrokê de cih girt. Tevî şert û mercên tecrîda girankirî Rêber Apo 27 sal in li Îmraliyê têkoşîna xwe berdewam dike û bi berxwedana xwe hêviya azadiyê dide gelên cîhanê.
Bi wesîleya salvegera Pêngava Azadiyê ya Navneteweyî ku bi pêşengiya dostên gelê Kurd di 10’ê Cotmeha 2023’yan de bi dirûşmeya ‘Ji Rêber Apo re azadî, ji pirsgirêka Kurd re çareseriya siyasî’ gelê Abya Yala yên ku ji vê berxwedanê bandor bûne peyamên xwe yên hevgirtinê didomînin.
Li ser vê bingehê li paytexta Kolombiyayê Bogotayê komek çalakvanên ji Abya Yala, ku ji paradîgmaya Modernîteya Demokratîk îlham digirin, çalakiyek agahdarkirinê lidar xistin û daxwaza azadiya fîzîkî ya Rêber Apo kirin.
Çalakiya ku li kolanên navendî yên bajêr hate lidar xistin, di tevahiya rojê de agahî li ser têkoşîna gelê Kurd û ramanên Rêber Apo hatin danîn. Di çalakiyê de muzîkên Kurdî hatin vekirin û pirtûkên Rêber Apo hatin nasandin. Nêzîkî 400 broşûrên agahdariyê li gel hatin belavkirin. Çalakvanan pirsên wekî “Kurd kî ne?”, “Rêber Apo kî ye?”, û “Perspektîfên wî yên felsefî û siyasî çi ne?” bersivandin.
Çalakî êvarê bi gerandina govendê li ber muzîka Kurdî bi dawî bû. Kolanên Bogotayê tevahiya rojê bi coşa muzîka Kurdî deng veda.
