Lijneya Rêveberiya Navendî ya DEM Partiyê bi wesîleya 11’emîn salvegera serketina Kobanê ku bi pêşengiya jinan li dijî tarîtiya DAÎŞ’ê pêş ket daxuyaniyeke nivîskî weşand.
DEM Partiyê, da zanîn ku 11 sal berî niha, li Kobanê bi têgihiştina “ketina Kobanê tê wateya ketina hemû Kurdistanê” tevgereke berxwedanê hat rêxistinkirin û got ku li dijî zihniyeta yekperest, mezhebperest û mêrperest yek ji berxwedanên herî bi heybet ên dîroka mirovahiyê pêk hat.
Berdewama daxuyaniya DEM Partiyê bi vî rengî ye:
“Ev berxwedan îro bi modela Rêveberiya Bakur û Rojhilatê Sûriyeyê ku gelan bi hev re jiyaneke hevpar ava kirin û diyarî tevahiya cîhanê kirin, hemû dinyayê ronî dike. Berxwedana Kobanê ku bi pêşengiya têkoşîna jinan hat meşandin, bingeha pêşxistina Pêvajoya Aştî û Civaka Demokratîk danî û îro ev banga dîrokî hêviya jiyaneke wekhev û azad temsîl dike.
Di pêvajoya dîrokî ya heyî de encamên giran ên civakî yên şerên belavkirinê yên li Rojhilata Navîn, careke din girîngiya jiyanî ya Banga Aştî û Civaka Demokratîk a Birêz Abdullah Ocalan dipeyitîne. Li Sûriyeyê nakokiyên neteweperest û mezhebî û berberîkirina civakî, ji hêla hêzên gerdûnî ve bi rêya netewdewletê ve tên kûrkirin. Di pêvajoyeke wisa de careke din tê piştrastkirin ku pergala civakî ya li Rojava ji bo jiyaneke azad û wekhev tekane alternatîf e.
Bi ruhê paradîgmaya Aştî û Civaka Demokratîk a ku ji hêla Birêz Abdullah Ocalan ve hatiye pêşxistin, em Şoreşa Kobanê silav dikin. Em biryardariya xwe ya ji bo berfirehkirina vê şoreşa ku gelan çarenûsa xwe bi berxwedana xwe nivîsîn, dubare dikin. Em ê vê feraseta şoreşger biparêzin û bi pêş bixin. 1’ê Mijdarê Roja Kobanê ya Cîhanê, bi taybetî li gelê Kurd û li hemû gelên cîhanê pîroz be.”
