Wezîrê Karê Derve yê Tirkiyeyê Hakan Fîdan bi serdanek fermî gihişt Bexdayê. Piştî Fîdan bi Wezîrê Karê Derve yê Iraqê Fuad Hisên re civiya, daxuyaniyek çapemeniyê hate dayîn.
Hakan Fîdan di daxuyaniyê de got ku divê Tevgera Azdiya Kurdistan li hemû parçeyên Kurdistanê kar û xebatên xwe bide rawestan û ji bo vê jî ji Iraq, Îran û Şamê alîkarî xwest.
Piştî hevdîtina di navbera wezîrê herdu dewletan de daxuyaniya çapemeniyê hat dayîn. Di daxuyaniya çapemeniyê de ewil Wezîrê Karê Derve yê Iraqê Fuad Hisên axivî û got ku peywendiyên Iraq û Tirkiyeyê dîrokîne û got; “Me îro civînek serkeftî pêkanî û yek ji mijara sereke ya civîna me, dosyaya avê bû. Heya niha 26 peymanên aborî, bazirganî, ewlekarî, çand, ciwan, rê, enerjî û gelek mijarên din bi Tirkiyeyê re hatine îmzekirin. Em dixwazin ev peyman ne tenê li ser kaxezê bimînin, bikevin meriyetê.”
Fuad Hisên, herî dawî got ku Iraq piştgiriya pêvajoya aştiyê ya li Tirkiyeyê û pêngavên Partiya Karkerên Kurdistan (PKK) dike. Fuad Hisên despêkirina xebata siyasî girîng wesif kir û soz da ku Iraq piştgiriyê bide pêvajoya aştiyê.
Piştî wê Hakan Fîdan axivî û got ku ew bi hempîşeyê xwe re civiyaye û wiha domand; “Wê para ava Iraqê were berdan, lê ji bilî vê Tirkiye wê di projeyên çavdêrî û avakirina binesaziyên ava Iraqê de, bi Iraqê re bibe alîkar. Li gorî me pêşxistina rêya bazirganiyê, projeyên hilberînê, hemahengiya di warên enerjî û hilberîna neftê de gelek girîngin.”
ROJEVA SEREKE: HEVKARIYA LI DIJÎ GELÊ KURD E
Her çiqas aliyan di daxuyaniya çapemeniyê de behsa pirsgirêka avê û peymanên bazirganiyê kiribin jî, armanca sereke dijminatiya gelê Kurd bû.
Hakan Fîdan ê ku ji destpêkê ve dijbertiya pêvajoya aştî û çareseriya demokratîk dike, careke din rûyê xwe eşkere kir. Fîdan di axaftina xwe de bal kişand ser pêvajo û pêngavên dîrokî yên Tevgera Azadiyê û got; “Me li ser pirsgirêka ewlehiyê nîqaş kir û em piştgiriyê didin pêvajoya aştiyê!”
Fîdan got ku ew hem li Bexda hem jî li Hewlêrê ji bo çekdanîna PKK’ê di nava danûstandinan de ne. Hakan Fîdan ji Iraqê jî xwest ku tevlî zextên ewlekariyê yên li ser Tevgera Azadiyê bibe û got; “Em heman daxwaz ji Şam û Tahranê jî dikin.”
