Partiya Demokrasî û Wekheviyê ya Gelan (DEM Partî), Partiya Tevgera Kedê (EHP), Partiya Azadiyê ya Civakî (TOP), Partiya Kedê (EMEP), Partiya Karker a Tirkiyeyê (TÎP) û Federasyona Meclîsên Sosyalîst (SMF) bi sernavê “Em ji bo aştî û demokrasiyê dicivin, li ser derfetên têkoşînê diaxivin” komxebatek lidar xistin.
Di roja duyemîn a komxebatê de Alîkarê Hevserokên Giştî yên DEM Partiyê Tayîp temel axivî, destnîşan kir ku aktorê esasî yê pêvajoyê Rêber Apo ye û anî ziman ku Rêber Apo ji sala 1993’an û vir ve hewl dide şer biqedîne.
Temel got, “Ev pêvajo ji bo desthilatdariyê ne rêya rizgarkirinê ye. Nêzîkatiyeke bi vî rengî wê şaş be. Em weke DEM Partî zanin bê ji 27’ê Sibatê û vir ve Ocalan ji bo derbaskirina pêşhukmên herdu aliyann têkoşîneke çiqasî mezin meşandiye.”
Temel anî ziman ku desthilatdarî naxwaze pêvajo li nava girseyên berfireh belav bibe û got, “Di vê pêvajoyê de hewl tê dayin ku bi operasyonan CHP’ê ji dora maseyê rake û fatûreyê li CHP’ê, li muxalefetê bê birîn. Sedemeke din a astengkirina civakîbûnê heye. Eger pêvajo civakî bibe, hingî vegera ji wê, wê ne hêsan be. Bi perspektîfeke ku xwe ji civakê xwedî dike, wê derfet ji desthilatdariyê bê standin ku kengî bixwaze nikaribe maseyê ji holê rake.”
Temel destnÎşan kir ku pêvajo derfetên mezin dide hêzên demokrasiyê ne desthilatdariyê û bi vî rengî dewam kir, “Xwedîderketina li vê pêvajoyê xwedîderketina li demokrasiya Tirkiyeyê ye. Xwedîderketina li vê pêvajoyê rabûna li ber mirinê û şer e. Xwedîderketina li vê pêvajoyê xwedîderketina li aştiyê ye.”
Di komxebatê de Parlamenterê CHP’ê Okan Onûr Konûralp jî axivî, bal kişand ser girîngiya hevparebûna partiyên muxalefetê û got, “Dema ku komar bi demokrasiyê tacîdar bû, ev yek wê ji bo me hemûyan baş be.” Nûnerê SMF’ê Mahîr Guz jî qala hesabpirsîna navxweyî û pêwîstiya yekîtiya tevgerên çep kir.
