Omer Ocalan beşdarî kongreya avabûnê ya Nûnertiya Komeleya Piştevaniya bi Malbatên Hikumxwar û Girtî (TUHAY-DER) a li Rihayê bû. Kongre li Salona Konferansê ya Tahîr Elçî ya Baroya Amedê pêk hat.
Omer Ocalan got, “Me beriya demeke nêz bi Serok re hevdîtinek kir. Di her hevdîtinê de Serok dibêje, hûn biçin kîjan civînê, hûn kîjan karî bikin silavên min li gelê min bikin” û silavê Rêber Apo ragihand.
Wekîlê DEM Partiyê işaret bi serdana Rêber Apo ya 31’ê Cotmehê kir ku di çarçoveya hevdîtina malbatê de pêk hat.
Omer Ocalan got, “Serok di hevdîtina me ya dawî de got, ‘Ez li vê derê dixebitim. Şev û roj dixebitim. Gelek derfetên we hene, saziyên we hene, divê hûn civakê bi rêxistin bikin. Pêwîste hûn wezîfeya xwe pêk bînin’. Kurdiya Serok gelekî xurt e. Piraniya hevdîtinê bi Kurdî bû, nîv saeta dawî ji bo axaftina li ser hin mijarên hesas ên siyasî bi Tirkî derbas bû. Divê dewlet gavên şênber biavêje. Kurdan berdêlên giran dan. Em ê li her derê xwedî li nirxên xwe derkevin.”
Hevseroka MED TUHAD-FED’ê Pinar Sakik Tekîn jî got, “Em bi biryar in ku li ser şopa Rêberê Gelê Kurd Birêz Abdullah Ocalan têkoşînê derbasî siberojê bikin.”
Sakik Tekîn got, “Em ji Enqereyê, ji komîsyonê re biêjin: Aştî bi azadiyê, bi demokrasiyê dibe. Li Kurdistanê wê karên me dewam bikin, heta ku derî li civaka demokratîk vebe wê têkoşîna me dewam bike.”
Li dû axaftinan Ayla Ozdemîr û Ferît Ak ji bo Nûnertiya Rihayê ya TUHAY-DER’ê hatin hilbijartin.
