Civaknas Gunay Yakût anî ziman ku li tax, gund û navenda bajaran divê navendên piştevaniya jinê, ofîsên piştevaniyê û qadên rêxistiniyê jinûve bêne avakirin.
Şaredariya Bajarê Mezin a Amedê bi dirûşma ‘Ber bi bajarên jinê ve’ dest bi hevdîtinan kir û li saziyên jinan, rêxistinên civakî yên sivîl û jinan guhdarî kir. Jinan li ser daxwaza xwe ya bajarekî çawa anîn ziman.
Yek ji beşdarên civînan civaknas Gunay Yakût ji ANF’ê re axivî û diyar kir ku nîqaş li dora pirsa ‘Em dixwazin li bajarekî çawa bijîn?” tê meşandin. Gunay Yakût ragihand ku jin ne tenê ji aliyê fîzîkî ve her wiha ji aliyê civakî û aborî ve jî daxwaza jiyaneke ewle û wekhev dikin û got, “Me îro li vê derê têkiliya jinan a bi bajêr re nîqaş kir. Beşdaran ji rewşa mîmarî ya bajêr heta bi keda li nava malê, ji ewlehiya parkan heta bi qadên hilberînê di gelek mijaran de pêşniyarên xwe kirin. Li Amedê avaniya bajêr ku di nava 15-20 salên dawî de guherî, cudahiya navbera tebeqeyên civakî mezin kir. Ev yek jî bandoreke yekser li jiyana jinan dike.”
Gunay Yakût ragihand ku jin berê li taxan, kolanan û parkan dikarîbûn li hev kom bibin, torên piştevaniyê ava bikin, lê belê ev qad îro kêm bûne û axaftina xwe bi vî rengî dewam kir: “Berê li taxan bi hêsanî karê rêxistinbûnê dihate meşandin, me tecrûbeyên xwe parve dikir. Niha beşeke mezin a jinan neçar têne hiştin ku li pişt deriyên girtî, li qadên zehmet bimînin. Ev rewş hem jinê vedişêre hem jî kapasîteya wê ya piştevaniyê kêm dike.”
Gunay Yakût diyar kir ku jin bi fikar in ku bi şev derkevin derve û destnîşan kir ku ev yek ne meseleyeke bi tenê ya şexsî ye; nîşaneya wê yekê ye ku jin li derveyî jiyana civakî tê hiştin.
Her wiha anî ziman ku li Amedê tundiya li hemberî jinê û xizanî zêede bûye û ev yek jî pêwendiya xwe bi pêvajoya qeyûm û avaniya civakî ya bi serweriya mêr heye.
Gunay Yakût diyar kir ku di civînê de yek ji pêşniyarên herî zêde hate kirin ew bû ku torên piştevaniyê yên jinan jinûve bêne avakirin û bi bîr xist ku ev tor berê bi karê parastina jinan radibû. Gunay Yakût got, li taxan, gundan û navenda bajêr divê navendên piştevaniya jinan, ofîsên jinan û qadên rêxistiniyê jinûve bêne avakirin.
