Gerîlayan bal kişandin ser girîngiya 25’ê Mijdarê Roja Têkoşînê ya Navneteweyî ya li dijî Tundiya li Jinê û destnîşan kirin ku têkoşîna azadiyê jinê bûye têkoşîna tevahiya mirovahiyê.
Gerîlaya YJA Starê Arjîn, endamê Akademiya Şehîd Sefkan û Awazê Çiya Argeş Delîla û gerîlayê HPG’ê Îsmaîl Xabûr bi wesîleya 25’ê Mijdarê ji ANF’ê re axivîn.
Gerîla Arjîn anî ziman ku di çarçoveya fikir û felsefeya Rêber Apo de ew li dijî mejiyê serweriya mêr têdikoşin û got, “Jin hîn jî her roj ji aliyê mêran ve têne kuştin, komkujiyên jinan dewam dikin. Sedema vê yekê ew e ku li hemberî mejiyê serweriya mêr têkoşîneke têrker nayê meşandin. Êrişên li dijî jinan di heman demê de êrişên li hemberî civakê ne. Mejiyê serweriya mêr dixwaze nasnameya civakê û cewhera wê tine bike. Li hemberî vî mejî divê em hîn xurt bin, têkoşîna xwe mezin bikin û hîn bêhtir xwedî li jiyanê derkevin. Eger îro hîn jî li nava civakê destdirêjî û kuştina jinê dewam dike, ev yek pirsgirêkeke cidî ye. Em jî divê di nava vê têkoşînê de hîn cidî bin, li hemberî mejiyê bi serweriya mêr hîn bêhtir xwe bi rêxistin bikin.”
KUŞTIN NE TENÊ TINEKIRINA BI FÎZÎKÎ YE
Endamê Akademiya Şehîd Sefkan û Awazê Çiya Argeş Delîla jî got, “Kuştin ne tenê tinekirineke fîzîkî ye. Mirov divê vê rastiyê baş fêhm bike. Eger ruh, dil û hestên mirovekî bêne tinekirin ev yek jî şêweyekî kuştinê ye. Ruh, hestên jinan her roj ji aliyê mejiyê serweriya mêr ve têne kuştin. Jin hebûneke azad e û azadîparêz e. Jiyan û civakîbûn bi destê jinê hatiye afirandin. Jİ ber vê yekê êrişa li hemberî jinê di heman demê de êrişa li hemberî hebûnê û jiyanê ye.
JIN DIKARE PÊŞÎ LI TUNDIYÊ BIGIRE
Rêber Apo di ‘Manîfesto’yê de li ser mijara kuştina jinan kûr bûye û perspektîfên xurt pêşkêş dike. Rêbertî koka pirsgirêkên navbera jin û mêr dispêre dîrokê û bi vî rengî pirsgirêkan analîz dike. Bi taybetî balê dikişîne ser girîngiya têkoşîna jinê û rêxistiniyê. Bêguman dema ku jin ji aliyê rêxistinî û fîzîkî ve xwe xurt kir, wê pêşî li tundiyê bigire. Tevgerên ku ji bo mafên jinan têdikoşin divê encaman ji perspektîfên Rêber Apo werbigirin û li gorî vê bimeşin. Eger pirsgirêk weke ku Rêber Apo diyar kiriye neyê fêhmkirin, hingî peydakirina çareseriyê jî zehmet e. Rêber Apo bi rengekî eşkere radixe pêş çavan bê di dîrokê de ahengiya navbera jin û mêran çawa xera bûye.
NIRXANDINA RAST Û RÛBIRÛBÛN
Divê bi hezaran dibistan û navendên perwerdeyê bêne avakirin. Perwerde nebe şaşitî jî nayên dîtin û çareserî nepêkan e. Herdu zayend hem divê xwe nas bikin hem jî rastiya dewlet û desthilatdariyê rast binirxînin. Eger ev nirxandin û rûbirûbûn bi rengekî rast bê kirin wê guherîn û veguherîn jî pêk were. Armancca bingehîn a hunermendên Kurd jî divê azadiya jinê be. Em ê xwe bi felsefeya Rêber Apo xurt bikin û li dijî mejiyê bi serweriya mêr li ser bingeha hevrêtiya rast têbikoşin.”
TÊKOŞÎNA RASTEQÎN RÊXISTINBÛN E
Îsmaîl Xabûr jî ragihand ku tundiya li hemberî jinê di heman demê de tundiya li hemberî xwezayê, jiyanê û mirovahiyê ye û got, “Di vê demê de Tevgera Azadiyê ya Jinê li Kurdistanê û Cîhanê li ser bingeheke xurt a îdeolojîk mezin dibe. Avabûna vê bingehê li çiyê, li bajaran bi bilindkirina dengê jinan ê li hemberî tundiyê pêk hat. Tevger weke fikir, alternatîfekê ne tenê sembolîk, veguherî alternatîfeke welê ku mejiyê mêrsala ê sîstema kapîtalîst red dike. Sîstema kapîtalîst bi taybetî êrişên mezin li hemberî jinê kir. Li qadên hunerî, çandî û civakî cihêkariya ji bo jinê hate kirin ji bo astengkirina jinê ya li qadên jiyana azad e. Sîstema kapîtalîst jinê dike weke metayekê.
Felsefeya Rêbertî jî jin a azad ji bo tevahiya mirovahiyê weke sembolekê nîşan dide. Felsefeya ku Zîlan, Sema, Zekiye Alkan, Bêrîtan û gelek jinên fedaî li çiyayên Kurdistanê afirandin, rêya herî rast a berxwedana li dijî tundiyê nîşan dide. Tevgera Azadiyê têkoşîna li Kurdistanê mezin kir, kir ku civak li rastiya xwe bipirse. Têkoşîna azadiya jinê veguherî têkoşîna ji bo tevahiya mirovahiyê. Têkoşîna rasteqîn bi rêxistiniya li ser xeta jin a azad dibe.
JIN LI HER DERÊ LI SER PIYAN E
Divê her kes li xwe bipirse û bersivên rast bide. Lêpirsîn çiqasî rast be wê ewqasî encamgir be. Têkoşîna jinê têkoşîneke bingehîn e ku mirov dike mirov. Her kesên ku dixwazin têkoşîneke rast bimeşînin divê beriya her tiştî xwe bi rengekî rast bi cih bike. Îro li çiyayên Kurdistanê, li her derê têkoşîneke mezin heye. Jin li her derê li ser piyan e. Li Rojhilat, li Rojava, li Bakur li ser bingeha felsefeya Rêber Apo têkoşîna jinê mezin dibe.”
