Gazî û yek ji rêveberê saziya gaziyan Deştî Amanos ê Kanûna 2017’an li Tebqayê di encama êrîşeke hêzên dagirker û çeteyan de gihiştibû şehadetê bi merasîmekê ji aliyê heval û hevrêyên xwe ve hat bîranîn.
Merasîm li Komeleya Gaziyan a Tebqayê bi deqeyek rêzgirtina ji bo şehîdan destpê kir. Ligel gaziyan malbata Deştî û endamên Meclîsa Malbatên Şehîdan jî di merasîmê de amade bûn.
Gazî Emced Tebqa yê ji pêkhateya Ereb e û demekê bi şehîd Deştî re mabû di axaftina xwe ya merasîmê de anî ziman ku komeleya niha lê kom bûne ji aliyê şehîd Deştî ve hatiye avakirin û got, “Heval Deştî bi jiyan û têkoşîna xwe mînak bû. Her tim ji bo azadiya gelan şer kir. Ti kes jê nediêşiya. Em ê ji bo armancên heval Deştî û hemû şehîdan di nav têkoşînê de bin.”
Gazî Axîn Kobanê jî di axaftina xwe de bal kişand ser taybetmendiyên şehîd Deştî û ev anî ziman, “Heval Deştî tevî gaziyek jî bû ti carî xwe ji kar û xebatên şoreşê paşde neda. Timî bi moral, rûken û bi coş bû. Ferq û cudatî nedikir nav hevalên jin û xort. Heval Deştî pir girîngî dida perwerdeyê û timî xwe pêş dixist. Heval Deştî pir dilpaqij, dilsozê Rêber Apo û şehîdan bû. Heya dilopek xwîn di laşê me de hebe, em ê li ser şopa şehîdan bimeşîn.”
Rizgar Efrîn û Hisên Reqa jî behsa berxwedan û têkoşîna şehîd Deştî kirin û diyar kirin ku ew deyndarên şehîdên xwe ne, wê ji bo serxistina hedef û armancên şehîdan têkoşîna xwe bidomînin.
Gaziyên tevlî merasîmê bûn bi wesîleya bîranîna şehîd Deştî soza xwe ya pêxistina têkoşînê nû kirin.
Piştî axaftinan ji bo bîranîna şehîd Deştî ji aliyê dayik û bavê wî ve mûm hatin pêxistin. Merasîm bi dirûşman bi dawî bû.
